Thung u Chief Minister ïa u Gagann Jain kum u Vice Chairman

Syllad | The Rising MeghalayaMarch 14, 2019

SHILLONG: Wat hapdeng ka jingkyrduh pisa ka Sorkar Meghalaya Democratic Alliance (MDA) hapoh ka jingïalam jong u Conrad K Sangma kala nang bteng ban thung briew ne political appointment bad dang shen ka Sorkar kala thung ia u Gagann Jain bad u Bah Hubert Marbaniang kum ki Vice Chairman.

Katkum ka notification no PIA.15/2018/33 tarik 6-3-2019, ka Sorkar ka la thung ia u Gagaan Jain kum u Vice Chairman jong ka State Government Programme Implementation & Monitoring Committee (SGPI &MC) ha ka kyrdan category B.

U Gagaan Jain u dei u centre head barim jong ka Sikkim Manipal University ha Nongbah Shillong bad u dei u State Executive Member jong ka Bharatiya Janata Party (BJP) bad haduh u snem 2017 u ju bat ïa ka shuki Vice President jong ka BJP.

Shuh shuh katkum ka notification no PIA.15/2018/32 tarik 6-3-2019, ka Sorkar ka la thung ia u Bah Hubert Marbaniang kum u Vice Chairman jong ka State Government Programme Implementation & Monitoring Committee (SGPI & MC)ha ka kyrdan category B.

U Bah Marbaniang u dei u President jong ka BJP South Shillong bad u la iakhun ruh ïa ka bye elekshon jong ka MDC na Laban Mawprem Constituency bad ula rem.

Kumba yn shu pynkynmaw, ha u bnai Kyllalyngkot mynta u snem, ki sengbhalang kiba kynthup ia ka Khasi Students Union bad ka Federation of Khasi Jaintia Garo People ka la pyrshah jur ia ka jingthungkam vice chairman ia arngut ki bar jylla kata u Vijay Raj bad u Pawan Sharma halor ka nongrim ba ki dei ki nongialam jong ka Non-Tribal Youth Union.

U Vijay Raj u la ioh ia ka shuki Vice Chairman jong ka Meghalaya Programme Implementation bad U Pawan Sharma kum u Vice Chairman jong ka Meghalaya Commission on Resource Mobilization.

Hynrei na ka daw jingpyrshang jong ki sengbhalang kitei ki arngut ki la ïehnoh  ïaka kam Vice Chairman.