Thok shukor u secretary VEC Namdong B iaki nongtrei job card kynnoh ka FKJGP

Syllad | The Rising MeghalayaJuly 8, 2020

Ka Federation Of Khasi Jaintia and Garo People (FKJGP) Jaintia Hills Unit kala kynnoh ba u secretary Village Employment Council (VEC) jong ka Namdong B um shym la siew iaka bai bylla sngi jong ki nongtrei job card na ka skim bylla MGNREGS ne ka 100 sngi.

U Vice president jong ka FKJGP u Marhok Marboh ula ong ba kila dep ban ai jingthoh sha ka BDO jong ka Thadlaskein Block bad la lap ba u Secretary VEC ka Namdong B u Deibha Thubru u khlem ai iaka thup muster roll ba trei bylla ki nongshong shnong ka Namdong B.

U Marhok Marboh ula ba hadien ba kila ai jingujor sha ka BDO naduh u u bnai Jylliew kila buddien na ophis ka BDO Thadlaskein bad la lap ba 6 ngut ki nong bylla shispah sngi haka scheme MGNREGA ha Namdong- B VEC. Kim shym la ioh bai bylla.

U ne u secretary VEC, hadien ba um lah ban siew iaka bylla sngi la kynnoh pynban nongtrei job card ba ki kim biang ki account number ha kaba kiwei pat ki nongtrei jobcard kila ioh ka bai bylla sngi jong ki naduh u bnai Nohprah bad Kyllalyngkot.

Ki kam ba ki trei ki ha katei ka shnong ki kynthup iaka kynroh bad surok (Cement concrete road cum retaining wall) na Namdong -B haduh Lum jingtep. Kawei pat kadei ka surok dewbilat ha Dong civil Namdong-B lkaba ka bai bylla sngi kadei 49 sngi marwei.

“Ka jingpyntrei ia katei ka surok bad ka kynroh ha kitei ki ar jaka kala long kaba torti bad ngi la lap bala pyndonkam ban pyn trei da u shyiap lum haka jaka u shyiap um bad shym la sabor iaka madan,” la ong u Marhok bad ula kynnoh ruh ba kane ka ingpyntrei tangdep kadei tang ban ioh myntoi u scretary ialade shimet.

Ka pisa kaba la mang ban pyntrei kalong:

Cement concrete road ha Dong civil Namdong – B kala kot Rs.18,25,000, Wages (bai bylla) Rs.11,45,375 bab ka bai tiar (Material) Rs.6,79,625

Cement concrete road cum retaining wall, Namdong-B khlieh Umslashiat haduh lum jingtep kala kot Rs.30,28,600, Wages (bai bylla) Rs.18,88,700, ka bai tiar (Material) Rs.11,39,900.

Ka FKJGP kala kynnoh ba ki paidbah nongshong shnong kila kynnoh ba une u secretary uleh bym suidniew iaka jingud jingnam jong ki haba kadei bad ka jingpyntreikam iaka skhim ha katei ka shnong bad shimkabu iaka kam kaba u bat.

Ka BDO kala ong ba kino kino kiba pynbdonkam bakla iaka skim kan nym map bad ba kan pynshitom katkum ki kyndon jong ka ain iaki secretary bad chairman VEC jong kano kano ka shnong.

Ka FKJGP kala dawa ba utei u secretary u dei ban ai iaka muster roll sha BDO ophis khnang ba kitei ki 6 ngut ki nongshong shnong bad kiwei ruh nangne shakhmat kim duh myntoi na kane ka skim.