Thep kyrteng u Bah Bonney ban iakhun ia ka elekshon MP

Syllad | The Rising MeghalayaMarch 19, 2019

SHILLONG: U Bah THS Bonney u  long u kyrtong uba nyngkong eh ban thep kyrteng ban iakhun ia ka elekshon sha ka iing dorbar thawain kaba 17^th jong ka  Lok Sabha na ka 1-Shillong Parliamentary Constituency.

U Bah Bonney u la thep kyrteng na ka party Khun Hynniewtrep National Awakening Movement (KHNAM) mynta ka sngi haba la synranlang ia u da u President jong ka KHNAM bad u MLA ka Shillong North U Bah Adelbert Nongrum lem bad ki nongkyrshan jong ka party.

Kane kan dei ka sein kaba ar haba u Bah Bonney un mih madan ban iakhun ia ka elekshon bad ka sien kaba nyngkong ka long ha u snem 2008 haba u la iakhun ia ka elekshon MLA na Sohiong Constituency  naka MDP bad u la ioh tang 182 votes na ka 22350.

U kyrtong jong ka KHNAM u long u ophisar rangbah bala shong thait jong ka Indian Forest Service bad un iakhun pyrshah ia u MP ba mynta bad u kyrtong ka Congress u Ma Vincent H Pala bad u kyrtong monlang jong ka MDA u Dr. Jemino Mawthoh.

Haba iakren bad ki lad pathai khubor hadien bala dep thep kyrteng, U Bah Bonney u la ong ba u la shim ia ka rai ban iakhun ka elekshon hadien ba u la iohi ia ka jingeh jingshitom jong ki paidbah khamtam ha ki thain nongkyndong.

Kumba yn shu pynkynmaw u Bah Bonney u la ujor PIL ne ka public interest litigation ha Supreme Court halor ka jingiakajia khappud hapdeng ka Assam bad Meghalaya kaba la neh naduh u snem 1972. Kane ka jingai mukotduma ka long kum ka lad ban khring ia ki vote na ki thain khappud kiba don ha ka jingiakajia.