Thep kyrteng ka Kong Amanda Pakyntien kurim u MLA ban iakhun na Mawkynrew

Syllad | The Rising MeghalayaFebruary 4, 2025

Ka Kong Amanda Pakyntein kaba dei ka kurim jong u MLA ka Mawkynrew bad Myntri barim ka Sorakr u Bah Banteidor Lyngdoh ha ka 3 tarik Rymphang ka la thep kyrteng kum ka kyrtong na ka seng National Peoples’ Party (NPP) ban iakhun ha kane ka elekshon ADC na Mawkynrew ka ban long ha ka 21 tarik Rymphang.

Haba kren sha ki lad pathai khubor, ka kong Amanda ka la ong, “Nga sngew skhem ban jop ia kane ka elekshon, bad nga pynthikna ba ngan bud ia ki dienjat jong u kurim ha ka ban wanrah ia ka roi ka par hapoh ka constituency bad ruh ban trei na ka bynta ban pynkhlain ia ka Sixth Schedule jong ka Riti Synshar ka Ri kaba dei ka bor iada kaba khlain na ka bynta ki paid riewlum bad ban pynneh pynsah ia ki riti dustur ba riewspah jong ka jaidbynriew.”

Haba ban jur halor ka jingdonkam ban pynkhlain ia ka dustur ai jait kmie, ka la ong ba ka long ruh kaba donkam ban wanrah ia ka synshar ka khadar kaba khuid ba suba ha KHADC. “Ngi donkam ban pynthikna ia ka jingthungkam kaba shai bad ruh halor ka jingdonkam ban iada ia ka mariang.

Nalor kata ka la kam ruh ba u kurim jong ka u la leh shibun kiei kiei na ka bynta ka constituency da kaba wanrah ia shibun ki kam pynroi bapher bapher na ka bynta ka bha ka miat bad ka jingmyntoi jong u paidbah.

Haba kylli, ka kong Amanda ka la ong, “Nga phah ia ka jingkitbok kitrwiang ia u MDC ba mynta. Nga la dei ban jop ia ka elekshon 2019, hynrei baroh ngi tip ba ngi la rem namar ka jingiatreilang hapdeng u MDC bad u Bah Remington Pyngrope. Hynrei, ha kane ka kynti kaba mynta, nga sngew skhem bad ngin jop ia kane ka elekshon.”

Na ka liang u Bah Banteidor Lyngdoh ruh ula pynpaw ia ka jingsngewskhem ba ka kurim jong u kan ioh ia ka jingjop ha  kane ka elekshon da ka jingieid bad jingkyrshan ki paidbah jong ka constituency.