Thep ka seng Khooid Ya Ka Wah Myntdu iaka T.5 Lakh sha ka kam pynbha mariang u DC West Jaintia Hills

Syllad | The Rising MeghalayaJanuary 8, 2024

Ka seng Khooid Ya Ka Wah Myntdu (KYKWM) kala pyntip ba la thep iaka pisa T.5 lakh (san lakh) kaba ai sngewbha da u kontrak uba shah bat ba khlong shyiap na Wah Myntdu sha ka account jong ka West Jaiñtia Hills District Environment Protection & Restoration Fund kaba khlieh da u DC bad u DFO (Social Forestry), West Jaintia Hills Jowai kum u member secretary.

Ka seng Khooid Ya Ka Wah Myntdu kala aiti iaka kot pynshisha ha u Bah BS Sohliya, DC West Jaintia Hills, haka 8 tarik Kyllalyngkot ba u Ma Friday Hinge u la dep thep ïa ka pisa ba San Lakh Tyngka ha ka account West Jaiñtia Hills District Environment Protection & Restoration Fund. La aiti ia kane ka kot pynshisha haka jingïalam u Khroo L Pariat President, Bichar Shylla Vice President, Kong Hunbeitki Dkhar Asst Genl Secy, Oriland Shylla Treasurer bad kiwei kiwei ki dkhot

Ha kane ka jingïakynduh ka seng ka la kyrpad jur ïa u DC ban pyntreikam noh wut wut ban khlong noh ïa u shyiap uba la pyndap ïa ka thwei Mupiah ka bynta ka Wah Myntdu ba tan um ka PHE sha ki longïing ha Jowai bad khamtam ïa kiba bun ki bynta ka Myntdu ba la ïohi ba la pyndap tang da ka khyndew bad shyiap, kumjuh ruh la buh ujor halor ka jingsdang duh noh ka liar pamblah kaba ai um ïa ki lyngkha bad ïa ka Myntdu, na ka daw ba pyntuid khyndew u contractor ba pyntrei ïa ka Jowai by pass.

Halor kane ka jingpyntuid khyndew u contractor sha ki synrang ba tuid sha ki liar, sha ka Myntdu, ka seng ka la dep ïa kren man la ki por naduh u DC ka district ba mynshwa, hynrei ka Meghalaya state pollution control board kaba dei ban bishar ban pynshitom ïa u Contractor kam pat treikam haduh mynta.

U DC WJHD u la kren shai ba un pyntreikam noh mar mar bad un hukum ha kine hi ki sngi ïa ki magistrate ban leit peit bad un sa pan ha kine ki sngi ïa ka kaiphoit treikam na ki tnat sorkar ba dei halor ka Myntdu. Ka seng ka don ka jingkyrmen ba une u DC ba mynta un pyntreikam hok shisha ïa ka hukum ka NGT hashwa ban poi ka samoi hiar slap.

Ka seng KYKWM ka kyrpad ïa baroh ki nongshong shnong kiba im kiba shong ha ka Myntdu ban ym shaniah tang ha ki bor ka sorkar, hynrei ban mih noh shakhmat ban tynrong lem halor kane ka kam im ka kam ïap ha kaba lada ki paidbah kin dang hun ban peit bad bun tang ki kyntien khlemyka kam, ka   jingjynjar ka la sdang rung kan ktah shisha ïa ka longbriew mambriew ha kine ki lum ki pdeng ba la khyrkhu ïa ngi.