Tang 1397 ki dukan bar jylla kiba don Trading License, ka JHADC ka dei ban khang lut ia baroh ki bym biang license: AJYWO

Syllad | The Rising MeghalayaApril 17, 2019

JOWAI:  Ka All Jaiñtia Youth Welfare Organisation (AJYWO) kala kam ba katkum ka jubab RTI kaba kala ïoh ba ki don tang 1397 ngut ki bar jylla kiba don Trading License ha baroh kawei ka Rilum Jaiñtia.

Kine ki barjylla kiba biang ki kot ki sla (Trading License) ba kila ioh na ka Jaiñtia Hills Autonomous District Council (JHADC) ban khaii pateng bad ban buh dukan kilong kumne harum:

Ladrymbai-508, Khliehriat-387, Jowai- 257, Hawkers-42, Coal/Cement-48, Umkiang-33, Dkhiah-38, Mynkre-20, Sookilo-17, Thangskai-12, Nongsning-8, Jalaphet-5, Moopala-4, Byndihati-2, Chiehruphi-6, Tongseng-10.

“Ngim lah ban pdiang ïa kane ka jingkhein kaba la ai da ka JHADC namar ba katkum ka jinglong jingman hi ha Rilum Jaiñtia khlieh la ka sngi la wan kiew ki bar jylla na kylleng ban khaii pateng. Ka jingduna ki Trading License ba pyllait da ka konsil ka dei ka jingbym pyntreikam hok ïaka  aiñ khaii pateng ki barjylla-The Jaintia Hills Autonomous District (Trading by Non-Tribals) Regulation (Act)-2011”, la ong u nongialam ka AJYWO U MH Dkhar bad ula bynrap ba ki bun bah ba ki bar jylla kiba bym don license kiba wan khaii hapoh u pud u ang ka konsil, hynrei namar ka jingbym larkam ka tnad Taxation JHADC, ka khajna kaba ka konsil ka dei ban ioh ka lait ei shabar ka pla jong ka.

Ha u bnai Naiwieng 26, 2018 ka AJYWO, hadien baka la ïoh jubab RTI kala ai dorkhat sha ka konsil ban dawa ban peit bniah halor ka jingai Trading License bad Non-Tribal Employees’ Service License ha ka Ri Jaiñtia bad la kyntu ban ai license sha ki nongkhaii bar jylla tang haki jait kam ba ki ki trai jylla kim lah ban pyniaid.