T.500 klur mang ka Sorkar Jylla ban pyntrei ia ka New Shillong Township Water Supply Scheme

Syllad | The Rising MeghalayaNovember 26, 2024

Ka Sorkar Jylla ka la mang haduh T.500 klur na ka bynta ban pyntrei ia ka skhim sam um New Shillong Township Water Supply Scheme.

Haba pyntip ia kane ha ka 25 tarik u Naiwieng, u Myntri ka Tnad PHE u Marcuise N Marak ula ong, “Na ka bynta ka New Shillong Township Water Supply Scheme, ngi la dep pyllait ia ka tender kaba kot kumba T.500 klur. Ngi la dep ruh ban ai ia ka work order ha kaba ka kam ka la sdang ban iaid.”

Halor ka jingsngewkhia ba la pynpaw da ki kontraktor, u Marak u la ong ba ka long kaba shem shitom ban ai kam lang ia ki kontraktor trai jylla lada ka sorkar ka hap ban pyntreikam ia ki kor ki bor bathymmai jong kane ka juk ha kaba pyntreikam ia kiba kum kine ki project.

“Ngi tip bha ia ki kam kiba donkam da ki kontraktor ki jong ngi, bad ruh na ka bynta ka synshar khadar kaba biang bad na ka bynta ka lawei jong ka jylla, ngi hap ban iaid katkum ki kor ki bor jong kane ka juk kaba thymmai bad lada ngi pyntreikam ia kine kan long kaba shem shitom ban ai kam lang ia ki kontraktor trai jylla,” u la ong.

“Mynta ngi la pyndonkam ia ki kor ki bor jingstad jong ka juk thymmai kaba mynta. Ngi la pyndonkam ia ka Skada system ia ka NST ha kaba ka kor internet kan treikam haba don ka jingbthei jong ki pipe khnang ba kan pynsuk ia ki heh ba dei khmih ban buddien namar kan pynpaw ia ki jingthud khlem da pynslem. Dei na kata ka daw ngi donkam ban shim ia kine ki buit thymmai bad lada ngi pyntreikam kan pynshem jingeh ia ki kontraktor trai jylla ki bym pat don ia ki jingnang jingtip,” bynrap u Myntri.

Haba kylli u Marak u la ong ba ka Tnad ka la buh ia ka jingtyrwa ban ioh ka jingmynjur na ka kynhun Myntri ban leh ei ei halor ki jingeh kaba iadei bad ka kam sam umbam umdih ha ka nongbah.

“Ka PHE ka dei ban khmih bniah halor ka jingpynbiang um kaba bun bad ka SMB ruh halor ka jingsam um. Ngam lah ban ong eiei halor ka rukom pyniaid ia ka jingsam um. Namar bun ki mat bad ki jingeh ki la mih kumta ngi la iakren bad u Myntri Rangbah nalor u Myntri ka Tnad Urban Affairs, ngi la pyrshang ban wanrah ia ka rukom treikam ba thymmai la ka dei kaba lah pyntreikam ne em, kane kan dei ka kam kaban sa iakren hapoh ka Kynhun Myntri. Kum u Myntri ka PHE, nga la buh ia kine ki kam hakhmat u Myntri Rangbah bad u Myntri ka Urban Affairs. Shisien ba ka Kynhun Myntri ka la pdiang, ngan sa lah ban batai ia phi shaphang ka rukom treikam kaba thymmai” bynrap.