T.10 lak synñiang u Chairman KHADC ha Mawryngkneng bad Pomlahier

Syllad | The Rising MeghalayaDecember 24, 2020

Ar tylli ki skul ha Mawryngkneng bad ka Iingmane ka Balang U Blei ha Pomlahier ki la ïoh pdiang jingmyntoi na ka jingïatrei shitom u MDC ka Sohryngkham, Bah Pynïaid Sing Syiem uba dei ruh u Chairman ka Khasi Hills Autonomous District Council (KHADC).

U Bah Pynïaid u la noh synñiang T. 3 lak bad T. 5 lak na ka skhim Special Assistance Grant (SAG) ban shna pynheh ia ka building skul jong ka Jubilee Presbyterian Secondary School, Mawryngkneng bad sha ka Church of God English School, Mawryngkneng. Nalor kine ki ar tylli ki skul ula synñiang T. 2 lak lyngba katei ka skhim ban shna ia ka kynroh jong ka Ïingmane ka Balang U Blei, Pomlahier.

U Chairman ka KHADC haka 22 tarik une u bnai u la leit ban plie paidbah ia kine ki kam kiba la pyndep lut mynta.

Ha ka jingialang ha Jubilee Presbyterian Secondary School la pynkup burom ruh ia 5 ngut khynnah pule kiba pass nyngkong ia ka eksam SSLC na kane ka skul (iwei iba ioh First Division bad 4 ngut pat kiba wan ha ka 2nd  Division). 

U MDC u la kular ruh ba kum u nongmih khmat un iai ai ka kti kadiang ka kti kamon bad ki bor pyniaid skul na ka bynta ka jingmyntoi jong ki khynah skul. “Ngan sa mang pisa ban shna ia ka surok dewbilat haduh phyllaw jong ka skul bad ban siang jingkieng ban kiew sha ka mala ba ha jrong”, u la ong.

Ha ka jingialang plie ia ka skul Church of God la wan ban ia donlang da u Bah Ronnie Wahlang, BDO ka Mawryngkneng C&RD Block. U BDO u la kyntu ia ki khynnah pule ban don ka thong bad ban kiar na ka jingshong kha khynnah namar kane kan ktah ia ki.

“Donkam ban ai jinghikai ia ki samla ba kin kiar na kaba shong kha khynnah”, la ong u Bah Wahlang. Na ka liang u Bah Pyniaid haba kren, ha shwa ban plie ia ka jingpynheh kamra skul, u la ban jur da kaba ong ba ka jingnang jingstad ka long ka ba donkam tam ha ka ne ka juk ba mynta. 

U kyntu ruh ia ki khynnah skul ban trei shitom bad ban nang kiew sha phrang ha ki jingpule jong ki. Ha kane ka sngi la ia don lang ruh u Sordar ka Mawryngkneng, Bah Peter J Lawai, ki nongialam ka Balang, ki nonghikai, ki khynnah skul bad kiwei kiwei.