Suba shah pyniap dusmon ka khynnah 12 snem ha WGH

Syllad | The Rising MeghalayaAugust 3, 2023

Ki pulit ka West Garo Hills ha ka 1 tarik mynta u bnai ki la lap ia ka metiap jong kawei ka khynnah kaba la don kumba 12-13 snem kaba lashah pyniap na ka shnong Jangrapara kaba hap hapoh Phulbari Police Station, West Garo Hills.

Hadien ba la pyndep ia ka post mortem la register case hapoh Tura Women PS hapoh ki kyndon jong ka POCSO Act bad ka jingtohkit halor kane ka jingjia ka la iaid shakhmat.

Haduh mynta ki pulit kim pat shym la ioh kem iano iano ruh halor kane ka jingjia, hynrei na ka liang u heh pulit uba shimti ia ka jingtohkit u la ong ba ki don ia ki sakhi satar pyrshah ia u briew uba la suba donkti ha kane ka kam pyntriem.

Ia ka kyrteng jong kane ka lanot ym shym la pyllait namar ka lah ban pynthut ia ka jingtohkit bad ruh kum ka dak ban burom na ka bynta ka mynsiem ba la khlad noh jong kane ka lanot.

Ha ka juh ka por la kyrpad ruh ia baroh ban ym pynphriang ia kino kino ki khubor hamsaia ha kaba iadei bad kane ka jingjia lyngba ki social media.

La kyntu ruh ba lada ioh ia kino kino ki jingtip ha kaba iadei bad u suba donkti ki lah ban aijingtip hapoh Police Control Room, Tura (Mobile No. 8837423053).Yn buhrieh ia ka kyrteng ka jong ki nongai jingtip.