Suba ka JAC ba pyndonkam bakla iaka pisa ha Nartiang Shakti Peeth ban myntoi ki nongiaid pilgrim

Syllad | The Rising MeghalayaJune 22, 2023

Ka Joint Action Committee (JAC) kaba kynthup iaka FKJGP, MPUF, JSU bad ka JPWO kala kynnoh baka don ka jingpyndonkam bakla iaka pisa ban pynbha iaka Nartiang Shakti Peeth ban myntoi ki nongiaid pilgrim.

Kane skim kaba pyntrei ha kane ka temple ba rim tam ha Rilum Jaintia ka dei lyngba ka PRASAD Scheme ne ka Pilgrimage Rejuvenation And Spiritual Augmentation Drive jong Ministry of Tourism kaba pyntrei da ka Meghalaya Tourism Nartiang Shakti Peeth.

Ki nongïalam ka JAC u Bin Raliang Chairman JAC uba long ruh u President FKJGP Nartiang Area Unit, u Chalbestar Myria Secretary JAC, Education Secretary MPUF Central Body, u Andy Sumer General Secretary JSU Nartiang Circle, u Rimioo Nongtdu President ka JPWO West Jaiñtia kila ong baka tnad tourism ka sorkar Jylla haka 19 tarik October 2020 kala khot tender naka bynta ki jingtrei iaki jingtei ba har rukom ban pynbha pynmiat iaka temple, mawbynna, ka jingpynthaba da ki light nalor kiwei kiwei ban myntoi ki nongiaid pilgrim kiba wan na kylleng ki jaka kaba la kynjoh palat T.5 klur tam.

Kaba lyngngoh pat ka JAC lyngba ka jubab RTI kala kynnoh baka don ka jingpyndonkam bakla iaka pisa ban pyntrei ia kane ka skim bad la kynnoh ba la shu trei torti iaki jingtei bad kam iahap bad ka pisa kabala mang.

Ka JAC kala kynnoh ba nalor bym ïahap ka rukom pyntrei bad ka pisa, ki kynnoh ruh ba don ki jingtrei kiba khlem trei ei ei kiba la kot duna 2 klur tam kiba kynthup ïaka Site Development with landscaping, drinking water, Solid waste Management, Resting Shed, Illumination Nartiang Monolith bad Illumination.

Ka JAC ka ïathuh ba shwa kane kala dep ai jingthoh sha u Lat ka Jylla, Assistant Engineer ka MTDC Shillong, Managing Director ka MTDC Shillong, Commissioner & Secretary ka tnat Tourism ka sorkar Jylla, MLA ka thaiñ ban kyntu tuklar ia kane ka kam, hynrei la kynnoh ba ym don mano mano ba shimkhia ban peit iaka rukom pyntrei ia kane ka skim kaba dei kawei na ki lad ban kyntiew ruh iaka kam jngohkai pyrthei.