Sohsat ki paidbah ka Jowai ba hap ieng lain 6-7 kynta tang ban leh KYC, kynnoh suki treikam ka gas agency

Syllad | The Rising MeghalayaNovember 29, 2024

Ban pyndep ia ka por ba la buh ha ka 30 Nohprah, ki nongshong shnong ka Jowai ki la ud ba ki la hap ban ieng lain jrong haduh 6-7 kynta ha ka Liquefied Petroleum Gas (LPG) agency, ka Rymbai Gas Agency ban pyndep ia ka ‘Know Your Customer’ (KYC).

Ki nongshong shnong ki la kynthoh shuh shuh ba ki la sngewsih ia ki por ba la buh bad ki rukom treikam namar ba ki hap ieng lain naduh mynstep ka por 6-7 baje mynstep, katba ka agency ka sdang ia ka kam jong ki ha ka por 11 baje mynstep bad la kynnoh ruh ba ka suki ka rukom treikam bad ka jingai jingshakri kane ka agency.

Kawei ka riew tymmen (senior citizen) kaba la hap ieng lain, ka la ong ba ka la shah pynbor ban ieng lain ar- lai sngi bad hap ban song ryngkat bad ka ja na ka bynta ban ioh bam. “Wat ha kane ka juk kam don ka jingburom iaki riew tymmen ne rangbah (senior citizen), hyrnei hap ban ieng ha u juh u lain namar ba la bthah ban wan da ki trai kyrteng ba register iaka tyndong shet jingshet (gas),” la ong ine i riew tymmen.

Katkum ka jingpynbna kane ka agency kaba la pynmih ha ka 30 tarik Risaw 2024, ka ong “Ngi na ka liang ka Office jong ka Rymbai Gas Agency, Jowai ngi pyntip ba ia kito baroh kiba don/pyndonkam gas ba kin wan sha office jong ngi kaba don ha lawmusiang, Jowai ba ngin lah ban pynbiang ia ka KYC jong ki ha shwa ka 30.11.2024.

Ki jingdonkam ba hap ban wanrah ki long Xerox bad Original copy jong ka Card Gas. Aadhar card, EPIC bad wanrah ruh ia ka registered mobile. Ia kane ka kam la bthah ba hap ban wan hi ki trai kyrteng, ngim lah ban pdiang lada ki trai card kim wan hi da lade.”

Pynban kane ka jingthmu ban pyndep iaka KYC kala wanrah pynban iaka jingsohsat ia u paidbah.