Sngew skhem u Mukul ban jop ka AITC na Tura namar ki paidbah ki angnud ia ka jingkylla

Syllad | The Rising MeghalayaApril 20, 2024

U nongialam ka All India Trinamool Congress (AITC) uba dei ruh u Myntri Rangbah barim ka Jylla u Mukul Sangma ha ka 19 tarik Iaiong, u la pynpaw ia ka jingsngew skhem ba ka party jong u kan ioh ia ka jingjop na Tura parliamentary seat namar ki paidbah nongshong shnong ka Garo Hills ki la angnud ban iohi ia ka jingkylla.

“Ngi sngew skhem kat haduh mynta ba ngin ioh ia ka jingjop bad Nga kwah ban ai khublei ia ki paidbah,” ong u Mukul haba kren sha ki lad pathai khubor hadien ba u la pyndep ia ka jingthep vote ban kyrshan ia u kyrtong ka party uba dei ruh u MLA barim na Rangsakona u Zenith M Sangma.

U la ong ruh ba ka jingkiew ka percentage jong ki nongwan thep vote ka pyni halor ka jingthrang jong ki paidbah ban wan iashim bynta bad kaba pyni ia ka dak halor ka jingangnud ban wanrah ia ka jingkylla.

“Kumba ka long haba ki paidbah ki la angnud shisha ban ioh ia ka jingkylla kane ka dei kaba phi iohi, bad kumta ngi sngew skhem ba ngin iaid sha ka lynti jong ka jingjop,” u la ong.

Haba kylli, u Mukul u la ong, “Kan don khyndiat ka jingiakhun hapdeng ki lai party (ha Tura) hynrei ka jingiakhun kan kham long bad ka sitting MP.”

“Ngi don ia ka vote bank. Ki constituency kiba la angnud ia ka jingkylla ki kynthup ia ka South West Garo Hills, North Garo Hills kumjuh ki bynta jong ka West Garo Hills, bad phi iohi ia kane ka jingthrang jong ki paidbah kaba pynpaw ia ka jingangnud ia ka jingkylla hapoh ki nongbah jong ki district ka Garo Hills. Nga tharai ba kane ka jinglong ka dei kaba nga la iohi ha kane ka ielskhon kaba mynta, kumta ngi kyrmen bad kane ka jingangnud jong ki paidbah kan long kaba seisoh,” bynrap u Mukul.

Halor ka jingpulom jong ka INDIA block ha Meghalaya, une u CM barim ka Jylla u la ong ba kane ka dei namar ka jingiasylla hapdeng ka Congress, NPP bad ka BJP.

Halor ka rai jong ka AITC ban ym pynieng kyrtong napoh Shillong seat, u Mukul u la ong, “Namar ba ngi la pynkhreh ban pyniaid beit ia ka jingthmu bad ka jingkut jingmut ban pynieng tang uwei u kyrtong kum ka India block, ngim shym la pynkhreh. U la ong ruh ba ka INDIA block ha ka jingshisha hi ka la pulom ha ka thain Shatei Lammihngi (North East).