Shimkhia ka Sorkar ban pynneh pynsah ia ka mariang bad ki jingthaw ba im, thaw haduh 6549 tylli ki BMC

Syllad | The Rising MeghalayaMay 23, 2024

Ka Sorkar Jylla ka la shimkhia ha kaba iadei bad ki sienjam ban ai jingiada bad ban pynneh pynsah ia ka mei mariang bad ki jait jingthaw ba im kiba don hapoh jong ka, kata ha kaba ka la thaw haduh 6549 tylli ki BMC ha Jylla.

Ia kane la pynbna ha ka jingrakhe ia ka ‘International Day for Biodiversity 2024’ kaba la long ha ka 22 tarik Jymmang hapoh U Soso Tham Auditorium Shillong ha ka jingiadon lang u Bah DP Wahlang, Chief Secretary ka Jylla kum u Kongsan.

Naduh ba la sdang ia ka Meghalaya Biodiversity Board (MBB) ha u snem 2012 ka Jylla Meghalaya ka ju rakhe ia kane ka sngi IDB man la ka snem hapoh ki District bad State level.

Haba kren ha ka jingialang u Chief Secretary u la ong ba ka Meghalaya kaba hap hapoh ka Indo-Burma Biodiversity Hotspot, ka dei kaba riewspah ha ka jingdon ia ki khlaw ki btap, ki jingthaw ba im naduh ki jingthung jingtep, ki mrad ki mreng bad ki sim ki doh, hynrei na ka jingnangbteng ha ka jingbun paid kane ka la buh jingma shibun ia ka mriang bad ki jingthaw kiba don ha ka.

Halor kane ka bynta u la ong ruh ba ka Meghalaya Biodiversity Board ha ryngkat ka Forest Department la khmih lynti ba kin shim ia ka bynta kaba kongsan ban poi sha ka thong katkum ka Biological Diversity Act and Rules.

U la ong ruh ka long kaba sngewkmen ba ka sorkar ka la lah ban thaw haduh 6459 tylli ki  Biodiversity Management Committees (BMCs) ha ka Jylla ha kaba ki Deputy Commissioner, Block Development Officer bad kiDistrict Nodal Officer jong baroh ki District ha ka Jylla ki don ia ka bynta kaba kongsan.

Ka phang pdeng jong kane ka jingrakhe ia ka IDB 2024 ka long “Be part of the Plan”, kata ka jingkhot ia baroh ki kynhun ban ai ka jingiatreilang na ka bynta ban pynneh pynsah ia ka mariang bad ki jingthaw ba im kiba long katkum ka Biodiversity Plan.

Ia kane ka sngi la rekhe ha kylleng ka jylla ha ryngkat ka jingiatreilang bad ka Dorbar Shnong, ki Skul, College, bad University da ka jingthmu ban ai jinghikai halor ka jingdonkam ban iada ia ka mariang bad ki jingthaw kiba don hapoh jong ka.

Shibynta jong kane ka jingrakhe na ka liang u Chief Secretary ula sam ruh ia ka khusnam sha ka shnong Jermanai na Umling Block Ri Bhoi district na bynta ba ki la shim ia ki lad ban pynneh pynsah ia ki jingdon jingem jong ka mariang bad la aiti ruh ia ka khusnam sha ka Paglapara BMC jong ka Zikzak Block South West Garo Hills.

Ha kane ka sngi ha ryngkat u Kongsan, u P Bakshi. IAS, Commissioner & Secretary, Forest and Environment cum Chairman, MBB, u RS Gill, PCCF & HoFF bad u S.M Sahai, IFS, PCCF (Wildlife & Biodiversity) ki la pyllait ruh ia ki Poster bad Booklet ha kaba iadei bad ka Biodiversity jong ka Meghalaya.