Shimbynta shitrhem ki riewngeit haka jingrakhe dap 136 snem ka Balang Unitarian ha Jowai

Syllad | The Rising MeghalayaSeptember 18, 2023

Kumba ju long man la u snem, ka Balang Unitarian, Jowai kala rakhe iaka lyngkhuh snem ba 136 (1887-2023) bala seng iaka balang ha kaba ki khun ka balang kila shimbynta shitrhem haka jingiaseng naduh ka por step haka sngi Nyngkong.

Ka Balang Unitarian ha kylleng ka rilum Khasi Jaintia, Ri Bhoi bad Karbi Anglong kala rakhe pyndonburom ïaka lyngkhuh snem ka balang.

Ka matpdeng ka long “To ialap, to pyrta iaka Niam U Blei, ba jingbha kan synshar halor ka pyrthei”.

Haka por step la pynlong iaka jingbuh syntiew ia u mot u Nongseng Rangbah ka Balang u Hajom Kissor Singh da u Moderator Chibordon S. Shylla bad pynher ruh iaka lama.

Haka nohphai sngi ka la don ka jingiaseng paidbah ba la pyniaid da u Moderator Kiki Pakma uba la thang ruh iaka sharak katba iaka khubor Anniversary la sam da u Rev. Sowat Laloo.

U Rev Sowat haba sam iaka khubor Anniversary, ula ong kane kadei ka sngi kaba kyntang jong ki riewngeit ka Balang Unitarian namar dei ha kum kane ka por ngi kynmaw ieid, kynmaw burom ia u Babu Hajom Kissor Singh bad ki nongbud jong u kiba la seng nyngkong eh iaka niam Unitarian haka Shnong Jowai haka 18 tarik Nailur 1887.

Ula ong ruh dei ha kum kane ka por ba ngi ai jingkhein sha U Blei, haduh katno ngi lah ban shakri iala ka jong ka niam bad haduh katno ngi lah ban ai ka jingshakri iaki para bangeit, ka iing ka sem bad iaka imlang sahlang.

Ula ong ruh ka Balang Unitarian ka hikai ban ngeit tang ha uwei U Blei, kum ki riewngeit ula kyntu ban bat ïaka soskular jong ka balang kata ban pynskhem ïaka jingngeit bad ban long kiba kylluid ka mynsiem bad ban shakri ïaki para briew bad ban synniang sha ka balang bad ka imlang ka sahlang ban roi ka par.

Haka nohphaisngi pat shuwa ban sdang ka jingïasengmiet la don ka jingïaid rah dongmusa da ki riewngeit ka Balang Unitarian.