Shimbynta ki 9 skul ha ka sports meet ka Pasadwar Cluster

Syllad | The Rising MeghalayaMarch 19, 2023

Ka Sports Meet kaba 14 ba la pynlong da ka Pasadwar Cluster haki arsngi lynter ka la poi sha kaba kut haka sngi Palei ka taiew kaba la dep haka shnong Kamsing.

Ka shnong Kamsing ka dei ka shnong kaba don harud ka wah Myntdu bad ban pynpoi sha kane ka shnong Ki khynnah skul bad ki nonghikai kiba hap hapoh ka Cluster Pasadwar ki hap ban shong da ka lieng kynda ban poi sha kane ka shnong ban iashimbynta ha kane ka sports meet.

Ki skul kiba hap hapoh ka Cluster Pasadwar ki don 9 tylli, kynthup 6 tylli na ka kyrdan Lower Primary School bad 3 tylli na Upper Primary School katba ki saw tylli ki shnong kiba hap hapoh ka Cluster Pasadwar ki long ka shnong Pasadwar, Lumpyngngad, Kharkhana bad ka shnong Kamsing.

Ha kine ki arsngi ki khynnah ki la ïoh lad ban ïakhun haki jingïalehkai bapher bapher.

Ïaka nam Best March Past haka kyrdan UP School la ïoh rah da ka skul Kharkhana UPS. Haka kyrdan LP School la ïoh rah da ka Pasadwar Govt LP School. Ka nam Best discipline la rah da ka Kamsing LP School.

Ka lahduh haka jingïalehkai footbal haka liang ki shynrang la ïoh rah da ka Kharkhana UP School bad na ki kynthei la ïoh rah da ka Pasadwar UP School.

Haka kyrdan Lower Primary School na ka liang ki shynrang la ïoh rah da ka Kamsing LP School bad na ka liang ki kynthei la rah da ka Kharkhana Govt LP School.

La sam ruh ïaka khusnam Best Athletes sha ki saw ngut ki khynnah kiba paw bha ha ki jingïalehkai. Haka kyrdan UP School kioh iaka nam best athlete la sam sha u Sumon Tudu na Kharkhana UP School bad ka Daiomika Shylla na Pasadwar UP School Na ka Liwer Primary School la ioh u Federation Swer bad ka Kobita Tati kiba n aka Kamsing LPS.

Ïa kane ka Sports Meet la plie ïaka da u General Secretary ka shnong Kamsing u Bah Augustine Pamblang haka jingiadonlang ki rangbah ka shnong, ki nongkit kam shnong bad ki khynnah skul.