Shim smai ka Dr Chandee kum ka MLA Gambegre; kular phaikhmat sha ki jaka sumar, surok bad bording

Syllad | The Rising MeghalayaNovember 28, 2024

Ka kurim u Myntri Rangbah ka Jylla ka Dr Mehtab Chandee A Sangma ha ka 27 tarik Naiwieng ka la shim smai kum ka MLA bathymmai ka Gambegre constituency da kaba kut jingmut ban shimkhia halor ki mat ba iadei bad ki jaka aijingsumar, ka bording ilektrik bad ki surok kum ki mat kiba hakhmat eh jong ka.

Ka Dr Mehtab ka la shah pyntian ha u Lamphang ka iingdorbar thaw ain u Thomas A Sangma ha ka jingiadon lang u Myntri Rangbah uba dei ruh u National President ka NPP u Conrad K Sangma nalor ki nongialam ba hakhmat bad ki nongkitkam ka party.

Ka Dr Mehtab ka la kylla long ka MLA kynthei kaba saw hapoh ka iingdorbar thaw ain hadien ba ka la pynliem noh ia ka MDC ka TMC ka Sadhiarani Sangma da kaba tam haduh 4594 vote ha kane ka elekshon kaba dang shu dep.

Haba kren sha ki lad pathai khubor, kane ka MLA bathymmai ka Gambegre ka la ong, “Nga sngew ba ka dei ka kam kaba khia khyndiat namar ka kam sain pyrthei ka dei kaba dawa shibun bad nga kyrmen ba ngan lah ban leh katkum ka jingkhmih lynti jong ki paidbah.”

Nalor kata ka la kular ruh ban shimkhia halor ki mat kiba hakhmat eh kiba ktah ia ki paidbah ka constituency khamtam ha ka liang ka jingpynbiang ia ki jaka aijingsumar, ki lynti surok bad ka bording ilektrik.

“Hooid, ha kine ki khyndiat bnai ba la dep nga la don hapoh kane ka constituency bad nga la iohi ba ka thain ka dang kham sahdien haba ia nujor bad kiwei pat ki bynta jong ka thain Rilum Garo, abd lehse ki don shibun ki daw halor kane, hynrei nga sngew ba ki dang don ki jingdonkam ba kongsan eh kiba hap ban leh ei ei kum ki jaka sumar, ki surok bad ka bording ilektrik namar ki dang don bun bah ki shnong ki bym pat ioh bording, ki don buntylli ki skul kiba la rim bad jot rathai bad ki dang don bun bah ki shnong ki bym ioh surok.Nga tharai kine ki dei ki mat kiba hakhmat eh bad nga tharai ngam shimkhia nyngkong eh ia kine ki bynta,” ong ka Dr Mehtab.

Da kaba pynpaw ba ki paidbah ka Gambegre ki la jied na ka bynta ka roi ka par, ka la ong, “Ka long kaba shisha, Nga tharai ka dei ka jingangnud kaba ki paidbah ki lah ban sngewthuh bad iohi ha ki khyndiat snem kiba la leit noh ha kaba ym shym la iohi ia ki kam pynroi kumta ki kwah ban ia don bynta lang noh bad ka sorkar, bad nga tharai kane ka dei kaba ki la jied.

Haba kylli, kane ka MLA bathymmai ka la ong, “Hooid phin ym lah ban khmih lynti ia kajuh ka jinglong namar Nga dei ka briew kaba iapher kumba long u Saleng. Nga tharai u don la ka jong ka jong ka jinglong.Ngan shim ia ki mat hynrei ym ha ka rukom kumba  la shim da u Saleng.Nga tharai ki mat kiba iadei bad ka thain bad ka constituency hi ki dei kiba kongsan namar ki don ka jingiadei bad ki paidbah.”

Kumjuh haba pynpaw ia ka jingdonkam jong ki kynthei ban don bynta ha ka kam sain pyrthei, ka Mehtab ka la ong, “Ha ka jingmut kaba kyllum nga la ju kren ia kane ba ki kynthei ki duna bha ha ka kam sain pyrthei.Nga pyrkhat ba kane ka la wan long namar ba ka kam sain pyrthei ka dei ka kam kaba eh, bad nga rai ba ngi kum ki kynthei bad kum ki nongiashim bynta kiba ia ryngkat ha ka imlang sahlang ngi dei ban mih shuh shuh ban iashim bynta, bad nga kyrmen ba magna kum kawei kin sa bun ki kynthei ki ban nang ioh mynsiem ban mih shakhmat ha ka kam sain pyrthei.”