Shim ka longkmie iaka kam ki nurse ki doctor ban pynkha ia I khunlung haka jaka sumar sorkar

Syllad | The Rising MeghalayaMay 28, 2023

Ka long ka jingjia kaba ym pat ju jia koit ba haka jaka sumar sorkar, ki riew paidbah ki shim iaka bynta ne ka kam jong ki nurse ki doctor kiba la pyntbit ialade ban sumar iaki nongpang.

Kane ka jingjia kala jia ha kawei ka jaka sumar sorkar- ka Lumshnong PHC kaba hap hapoh ka Sutnga Saipung Constituency bad Lumshnong C&RD Block, East Jaintia Hills ha kaba kawei ka longkmie kaba ap hospital kala shim bynta jong ki nurse bad doctor ban pynkha ia I khunlung kawei ka long kaba na Chiehruphi.

Ka Khasi Students’ Union (KSU) kala kynnoh ba kane ka jingjia haka ka 21 tarik Jymmang.

U president ka KSU Lumshnong u Olenbat Pdang, ula kynnoh ba kane ka jingjia ka jia namar ba phiel ki nurse ki doctor ka Lumshnong PHC ban pyndep iaka kamram bad ka jingshakri ba ki dei ban ai.

Ula ong ba kane ka longkmie na Chbiehruphi kala wan ha kane ka jaka sumar ban kha khun. Ula ong ba ha ka miet 21/05/2023 kumba 10 baje eiei kaba dei ka miet Sunday (Sngi U Blei) kane ka longkmie namar ba la dei ka por kha ia I khun ka la leit ha katei ka hospital.

Une u nongialam ka KSU ula ong hadien ba ki nurse ki la dep peit ki la iathuh ba ka por ban kha kan dei 2 baje shiteng synñia bad I la iathuh ruh ba itei I khyllung I la iap. Bad kitei ki nurse hadien ba ki la dep batai kumtei ki la leit thiah sha jaka ba ki sah. Hynrei 12 baje shiteng synñia I tei I longkmie I la suh khun bad kiba ha ïng kiba ia donlang ki la phone sha ki nurse ale kloi, hynrei kitei ki nurse kim treh wan ki shu batai ha ka phone call ban leh kumne kumtai bad ai da ka um ban dih.

Jia ryngkhat ba la ap miet lang ia itei I longkmie da iwei I riew tymmen ba juh donsap ban pynkha khun iba dei ba ha ïng ha sem im banse ban pynkha hi namar bymlah ap kat ban poi kitei ki nurse, la ong u Olenbat.

Ula ong shuh shuh ynda la dap 2 baje thik kitei ki nurse ki la poi bad lap ba la dep pynkha. Hangta kitei ki nurse ki la ong, oo la dep pynkha mo, bad ki leit phai biang sha jaka sah bad thiah sha ka jaka sah bad ym dei ruh ha kamra ki nurse ha hospital.

Ka KSU kala pynpaw iaka jingsngewlyngngoh halor kane ka jingbym pyndep hok ki nurse iala ka kam bad kane ka jingkhein sting ka lah ban wanrah iaka jingjia ba sngewsih, lada jia bym don itei meirad iba tip ban pynkha khun.

Ka KSU kala ong ruh ba kane ka jaka sumar ka don uwei u doctor bad ha kane ka sngi ba jia um don ha PHC.  Une doctor ruh ula dei ban leit pyntbit ialade, hynrei namar ba ka sorkar kam thung ula hap ban neh ban ai jingshakri ha kane ka jaka sumar.