Shim jingkhein ka SSA bad ALIMCO ïa ki khynnah ba don jngduna ha West Jaintia Hills

Syllad | The Rising MeghalayaDecember 2, 2021

Ka ophis treikam ka District Mission Coordinator, SSA West Jaintia Hills ryngkat ka jingiatreilang bad ka Artificial Limbs Manufacturing Corporation of India (ALIMCO) naduh ka 29 tarik Naiwieng haduh ka 1 tarik Nohprah 2021 ki la pynlong ia ka Assessment Camp ha ki lai tylli ki Block jong ka District ba kynthup ia ka Thadlaskein, Laskein bad Amlarem.

Ha ki lai sngi jong kane ka Assessment Camp ha man ki Block ki longkmie longkpa da ka jingsngewkhia ia la ki jong ki khun ki kti kila wan iashimbynta bad ialam ia ki khnang ba ki briew ka ALIMCO kin pynbiang iaka jingdonkam ki khynnah kiba don jingduna ne ki Child with Special Needs (CWSN).

Haduh 35 ngut ha Thadlaskein, 52 ngut ha Laksein bad 42 ngut ha Amlarem kila wan sha kane ka camp.

Ki briew na ka ophis treikam jong ka SSA Meghalaya kiba la iadonbynta ha kane ka Assessment Camp ki kynthup ia ka M Kharbyngar, State Coordinator IE SSA-SEMAM Shillong, u LK Singh, District Coordinator, IE SSA West Jaintia Hills bad kiwei ki Volunteerkatba na ki Medical Team ka ALIMCO, Guwahati pat lawan ban mihkhmat da u Aditya Kumar Naik, Audiologist bad u Subodh Kumar Orthotics and Prosthetics.

U LK Singh, District Coordinator, IE SSA, West Jaintia Hills haba iakren u la iathuh ba ka thong jong kane ka Assessment Camp ka long ban iit bad wad ia ki khynnah ba don jingduna khnang ba na ka liang ka ALIMCO, Guwahati kan lah ban ai jingiarap ia ki da ki tiar ha ki por ki ban sa wan ki ban kham pynsuk ia ki la ha ka iaid ka ieng, ka bor iohsngew bad bor iohi ba kynthup ia ka Wheelchair, CP chair, Crutches, Smart cane & Braille kits for the blind, Multi-Sensory Inclusive Educational Kits for Intellectual Disability bad Hearing Aids.