Shillong Premier League: Hato ka Mawlai kan bat biang iaka nam lahduh ne yn knieh ka Lajong?

Syllad | The Rising MeghalayaMarch 15, 2025

Ki riew ieid football ki la thrang dik dik ban leit sha madan Polo haka sngi Saitjain 15 tarik Lber ban sakhi mano ban ioh rah ia ka nam lahduh jong ka lympung OC Blue Shillong Premier League 2024, hapdeng ka Mawlai SC bad ka Shillong Lajong FC ha ka por 5:30 janmiet ha madan SSA Stadium First Ground.

Kane ka lympung ialehkai football jong ki shynrang ba la pynlong da ka Shillong Sports Association ka la nangheh katba nangmih ki sngi ki snem, ha kaba mynta u snem ki la don haduh 10 tylli ki Club kiba la iakhun haduh 89 sien ha kaba kane ka jingialehkai ha ka sien kaba 90 kaba dei ruh ka jingialehkai kaba khatduh haka sngi Saitjain.

Ka Mawlai kaba dang bat ia ka nam lahduh mynta ka dang phaikhmat ban ioh ia ka jingjop kaba laisien kynthih (Hat-trick) hadien ba ka la ioh ia ka nam lahduh ha u snem 2022 bad 2023 jong kane ka lympung SPL.

Ha kawei pat ka liang ka Lajong FC kaba la jop bun eh ha ka SPL, ka la ioh rah haduh saw sien ia ka nam lahduh, kata kaba khatduh eh ka dei ha u snem 2019.

Haduh shwa kane ka jingiakhun kaba khatduh eh, ka Mawlai ka la ioh 45 point bad don ha ka kyrdan kaba hakhliehduh, katba ka Lajong ka ioh 42 point bad wan ha ka kyrdan kaba ar.Kata ka mut ba ka Mawlai ka donkam ban kair tang na ka jingshah rem ban ioh rah ia ka thong ha ka sien kaba lai kynthih, katba ka Lajong ka donkam ban jop lada ka kwah ban long ka champion.

Ka Lajong kam shym la lah satia ban pynliem ia ka Mawlai ha ki sawtylli ki jingiakhun ha ka lympung OC Blue SPL.Kine ki arkynhun ki la iakynduh ruh ha ka jingialehkai final jong ka Meghalaya State League ha u bnai Rymphang ba la dep ha kaba ka Mawlai ka la lah ban pynliem noh ia ka Lajong ha ka Tie Breaker.

Watla kim shym la jop ruh, ka kyrdan ba ar dei ka jingiakhun ba bha tam jong ka Lajong ha ki laitylli ki samoi ba la dep. Hynrei na ka liang u Coach u Bah Bobby L Nongbet khlem artatien u don ia ka thong bad ka jingangnud ym da kumwei pat hynrei ban ioh rah ia ka thong. Ha kawei pat ka liang u la hap ban iakhun pyrshah ia uwei na ki Coach ia uba la shim ba u dei uba tbit bad shemphasng shibun u Bah Hering Shangpliang uba la btin lynti ia ka Mawlai sha ka SPL 2023 bad MSL 2024. U Khlain Pyrkhat Syiemlieh u la ialam ia ka kynhun sha ka SPL 2022 trophy.)

Haba kren sha ki lad pathai khubor haka 14 tarik Lber, u General Secretary ka SSA u Bah Dipshon L Nongbri u pyntip ruh ba kila khot sngewbha ia ki rang ialehkai ialehkai football jong ka ri ba kin wan sakhi ia kane ka jingialehkai final. Kane ka kynhun Blue Tigers ka la don ha kane ka nongbah ban pynkhreh na ka bynta ki artylli ki jingiakhun (international matches) ki ban long ha kane ka nongbah Shillong. U la ai khublei ruh ia ka sorkar khamtam ia u Myntri Rangbah ka Jylla halor ka jingbei tyngka kaba heh bha ban kyntiew ia ka sports lyngba ki jingtei ia ki jaka ialehkai naduh kine ki snem kiba la dep bad bynrap ruh ba ka long kaba donkam shuh shuh ia ki madan football ha kane ka nongbah bad sha kiwei pat ki jaka ban kyntiew shuh shuh ia kane ka jingialehkai sports hapdeng ki samla ka jylla.

Ha kane ka jingialang bad ki lad pathai khubor la ia don lang ruh u Bah Teibor Dohling uba dei u dkhot ka Mawlai SC bad u rangialehkai ka Mawlai u Damanbhalang Chyne. “Ngi kyrmen ba ki nongkyrshan jong ngi kin wan ban ai ka jingkyrshan ia ngi,” ong u Bah Dohling. Jin lada ngi la lah ban pynliem ia ka Laitkor ngi la lah ban long ka lahduh, hynrei kane ka dei kaei kaei kaba la dep. Baroh kiba don ha ka kynhun ki long kiba la pynkhreh bha ialade na ka bynta kane ka jingiakhun kaba long thik kum ka final.”

Katba ia ka Lajong la mihkhmat da u Bah Milan Nongkhlaw bad u Nongapkol u Siwel Rymbai.U Bah Nongkhlaw ula pyntip ba ka Lajong ka la iashim bynta dang shen ha ka Bordoloi Trophy ha Assam ha kaba ka la rem noh ha ka semifinal, kumta ki nongialehkai kim shym la ioh por bha ban pynkhreh ne ban shongthait. “Ngi hap ban ai khublei ia ki rangialehkai kiba la pynpoi ia ngi haduh kane ka khyllipmat. Kila don ki katto katne ki jingiakhun kaba ngi lah duh ia ki point hynrei wat la katta ruh baroh kila ialehkai bha ,”ula ong.