Shen yn trei ka jaka rieh tngen por miet na bynta ki briew bym don ïing don sem

Syllad | The Rising MeghalayaMay 21, 2019

SHILLONG: Ka long khubor kaba ai jingkyrmen ia ki briew ki bym don iing don sem kiba thiah miet  ha ki lynti syngkein na ka daw jong ka jingduk jingkyrduh namar ka Sorkar Jylla kan sa pyntreikam ia ki jaka sah miet ne ki night shelter home ha Shillong, Jowai, Tura bad Williamnagar.

Kane ka la urlong na ka daw jong ka jingai mukotduma ne Public Interest Litigation (PIL) da u Bah Khroolamsalanki Pariat pyrshah ia ka Jylla Meghalaya ha ka High Court jong ka Jylla Meghalaya.

Katkum ka jingkular bala ai da ka Sorkar Jylla lyngba ka Joint Secretary jong ka tnat Urban Affairs ha Iingbishar ha ka Sngi Nyngkong  mynta ka taiew la iathuh ba ka jingpynheh ia ka jaka rieh tngen por miet ne ka night shelter home kaba don ha ka mala ba nyngkong jong ka Shillong Municipal Board (SMB) ka la sdang bad ka kam ka la iai shait shait.

Shuh shuh ki jingai ia ki tiar ki tar kiba donkam kum ki jingthiah, ki pyrda, ki tusok, ki shuki, ki miej sha ki jaka rieh tngen por miet bala don lypa hapoh jong ka SMB la sdang bad yn sa la ban pyndep hapoh 30 tarik u bnai Jylliew mynta u snem.

Katba ka jingshna ia ka jaka rieh tngen por miet ha Jowai la dep pura bad mynta dang leh ia ka jingring bording kaba kumno kumno kan bam por shi taiew bad hadien kata yn sa ai lut ia ki jingdonkam baroh khoit.

Haba iadei ba ka Williamnagar, la bthah ia u Deputy Commissioner ban thaw lad thaw lynti kumno ban pyntreikam ia ka jaka rieh tngen por mietbashipor ha kino kino iing sorkar. Kane ka jaka rieh tngen por mietkan treikam ha kawei ka quarter sorkar ha DC Colony kaba don san kamra bad ia kane ka iing la aiti ban pyniaid da ka Williamnagar Municipal Board bad ki jingdonkam baroh khoit yn sa pynpoi sha Williamnagar.

La bthah ia ki lai tylli ki Municipal Boards kata ka Shillong, Jowai bad Tura ban phah ia ki jingdonkam jong ki na bynta katei ka jaka rieh tngen por miet bad ka sorkar kan sa khmih biang bad leh ia kaba donkam sah ka 30 tarik u bnai Jylliew.

Ka Sorkar Jylla lyngba u nongiasaid ain jong ka, ka la ai ia ka jingkular ba ka Sorkar kan shimkhia ban pyndep ia kane kam  bad ai ia ki jingdonkam na ka bynta kane ka jaka rieh tngen por miet ban pyniaid da ki Municipal Board hapoh 30 tarik u bnai Jylliew mynta u snem.

Halor ka jingkular jong ka Sorkar, ka Iingbishar ka la pynkut noh ia katei ka PIL bad ka la ong ruh ba lada u nongujor u shem ba don kano kano ka jinglehsting da ka sorkar u la ban ujor biang.