Shen yn pyndep ia ka jingleh sorbe ia ki shnong Khasi-Pnar ha ka thain Block I: Dhar

Syllad | The Rising MeghalayaDecember 28, 2023

Ka jingleh sorbe ia ki Shnong Khasi – Pnar kiba hap hapoh Block – I jong ka West Jaintia Hills, kata ha khappud bad ka Assam  kan shim por satang kumba ar taiew ban pyndep.

“Ka jingthmu ban pyniaid shakhmat ia kane ka jingleh sorbe ka long ban lum ia ki kyrteng jong ki shnong Khasi Pnar kiba don ha ki thain khappud bad ka Assam,” ong u Symbud Myntri Rangbah ka jylla uba dei ruh u Myntri ka Tnat Urban Affairs u Ma Sniawbhalang Dhar uba khlieh ia ka regional committee na ka bynta ka West Jaintia Hills District.

“Ia kane ka jingleh sorbe la pyniaid shakhmat naduh kine ki ar bnai ba ladep. Mynta donkam satang kumba artaiew ban lah ban pyndep ia kane ka jingleh sorbe,” ong u Myntri.

Katkum ka jingpynpaw ka jong u, ki regional committee na Meghalaya bad Assam ki lah ban iakynduh biang ha une u bnai Kyllalyngkot 2024.

Na ka liang ki nongialam shnong kynthup ia ki Sengbhalang bapher bapher ki la dawa ia ka sorkar Meghalaya Democratic Alliance – 2 ban pynthikna ba baroh ki 36 tylli ki shnong kiba hap hapoh Block-I dei ban pynphai pat sha Meghalaya.

Ka Block-I ka dei kawei napdeng ki hynriew tylli ki jaka khappud kiba dang don hapdeng ka jingiapher jingmut bad ia kiba dei ban dang iakren iapynbeit hapdeng kine ki artylli ki jylla ha ka wat kaba ar.