Shen yn pynbna ka UDP ia ka list ki kyrtong election MP, MDC: Paul Lyngdoh

Syllad | The Rising MeghalayaDecember 1, 2023

U nongialam ka Seng United Democratic Party (UDP) uba dei ruh u Myntri ka sorkar jylla u Bah Paul Lyngdoh haka sngi Thohdieng u la ong ba ka jingjied ia ki kyrtong na ka bynta ka election sha ka Lok Sabha yn pyndep hapoh jong une u bnai.

Haba kren sha ki lad pathai khubor u Bah Paul u la ong; “Kumba ka long hapoh ka Seng UDP, ngi la dep iaid shakhmat na ka bynta ban jied ia ki kyrtong bad kane kan iaid ha kine ki shibnai kynthih lane kham kloi ia kata.”

Nalor kata u la ong ruh ba u president barim ka seng Hynniewtrep Youth Council (HYC) u Bah Robertjune Kharjahrin u dei uwei na kiba la pynpaw ia ka jingangnud ban ioh ban iakhun ha kane ka election Lok Sabha na Shillong parliamentary seat.

“Katba ngi dang iakren, ki al don 3-4 ngut kiba la pan tiket, bad Nga tharai ba kane ka dei ban long kaba la pynkhreh ha kine ki khyndiat taiew naduh mynta ka sngi,” u la ong shuh shuh.

Nalor kata u la ong ruh ba ka jingpynkhreh ha kaba iadei bad ka ilekshon MDC ruh ka la dep iaid shakhmat. Na ka liang ka state election committee ka la dep ruh ban iakynduh kumba katto katne sien ha kaba iadei bad kane ka bynta. “La kumno kumno ngin la wan ha ryngkat bad ka list jong ki kyrtong kat haduh kaba kut jong u bnai Kyllalyngkot u ban wan.”