Shah u CE ka MeECL ujor ka KSU bym ioh trei ki trai jylla ha Leshka

Syllad | The Rising MeghalayaOctober 19, 2020

Ka Khasi Students’ Union (KSU) War Jaintia Circle kala ujor sha u Chief Engineer (Civil Work) jong ka Meghalaya Energy Corporation Limited (MeECL) halor jingbym ioh trei ki trai jylla ha Leshka.

Ka KSU kala pynpaw ka jingbnynñiaw kaba khraw halor ka rai jong Meghalaya Energy Corporation Limited (MeECL) ban ai jingtrei ha ki company bar jylla na ka bynta kino kino ki kam tei jingtei bad shna maramot ha Leshka. Ka KSU kala kynnoh ruh baka MeECL ka khlem pynbna paidbah ruh iaki tender naka bynta kino kino ki kam ha Leshka.

“Ka MeECL kala leh shilliang khmat namar ba bun ki trai jylla, ki company bad ki riewshimet kiba lah ban trei ia ki kam bad projek ha Leshka, hynrei ka MeECL kala ai kam pynban tang iaki bar jylla bad ki company kiba nabar kaba pynduh lad ia ki trai jylla. Kane ka wanrah ruh iaka jingwan buhai shnong ki bar jylla kiba trei bylla kiba wanrah ki company,” la ong ki nongialam ka KSU War Jaintia Circle ba kynthup ia u president bad secretary u Laitphar Syngkrem bad Lurman B Talang.

Ka KSU kala kyrpad ia u Chief Engineer (Civil Work) ban pynbna paidbah iaki tender na bynta kine kino ki kam ha Leshka bad ka MeECL kadei ruh ban ai kam iaki trai jylla ia ki kam kiba ki lah ban trei khnang ban myntoi u paidbah ka thain.