Shah rem ka NPP ha ka Ilekshon Lok Sabha namar ka Reservation Policy, ym namar ka BJP: Dr Kharlukhi

Syllad | The Rising MeghalayaJune 20, 2024

U MP ba marwei ka Rajya Sabha u Dr WR Kharlukhi ha ka 20 tarik Jylliew u la ong ba ka daw ba hakhmat eh ha lyndet ka jingshah rem jong ka National People’s Party (NPP) ha kane ka ilekshon Lok Sabha kaba dang shu dep shen na Tura bad Shillong seat ka dei namar ka ‘State Reservation Policy” ym namar ba kyrshan ka BJP.

Katkum ka jingsngew ka jong u, u la ong kan bha shibun ia ka party ba kan shah rem ia ka ilekshon na ka bynta ka jingiatylli jong ka Jylla.

Nalor kata une u state president barim ka NPP u la maham ruh ba ka dei ka dak ba sniew ia ka Jylla lada ia ka ilekshon la jop tang namar ka jingshah jingit ban dawa pynkylla ia ka ‘Job Reservation Policy.”

Haba kren sha ki lad pathai khubor, u Dr Kharlukhi u la ong ba ka NPP ka la iatyngkhuh bad ka lyer kyrshan ia ka Voice of the People Party (VPP) hapoh Rilum Khasi Jaitnia bad ka lyer kyrshan Congress ha Rilum Garo ha kane ka ilekshon Lok Sabha kaba dang shu dep.

“Ha baroh kine ki artylli ki jingbeh lyer, ngi la shah rem noh namar ka State Reservation Policy. Ha Khasi bad Jaintia, ki kwah pynkylla bad ki phai sha ngi kum kiba pyrshah bad sha Garo pat kim kwah ban pynkylla bad ki phai sha u Myntri Rangbah kum uba kham pynleit jingmut ia ki jingdonkam ha Khasi Hills,” u la ong da kaba bynrap, “Hynrei nga pyrto ia u CM namar ka don ka por ha ka kam sain hima ba na ka bynta ka jingiatylli ka Jylla kan bha ba ngin rem ha ka ilekshon, hynrei kum u statesman, phi hap ban rai ia kaei kaba bha.”

“Hapdeng ka jingjur jong ka jingiakhih kaei kaba u CM u hap ban leh, u la hap ban khot ia ka jingialang bad u hap ban mynjur ban pynkylla namar ha ka jingiohi ka jong u, hooid ba dei tang kane ka lynti bad nga tharai ka la sangeh ia ngi shatei bad shane ruh kumjuh,” u la ong.

Kumjuh u Dr Kharlukhi u la ong ruh, “Lada la jop ia kane ka ilekshon da ka sain pyrthei kaba khuid kan long kaba bha shibun. Nga kren ia kane ka thain Khasi Jaintia, Ngam kren halor ka Garo Hills. Hynrei, lada la jop ia kane ka ilekshon namar ka jingshah rem na ka bynta ban dawa pynkylla ia ka Reservation Policy, ngan ong haphi ka dei ka dak kaba sniew bad wat khuslai namar ma ngi baroh ngin sa ioh kheit ia u soh bad Nga tharai ngin dang im hi ban iohi ia u soh ba ngi kheit. Kane ka dei ka jingiohi ka jong nga. Ka kam sain pyrthei kaba khuid, hooid nga sngew ka la dei ka por ba ki paidbah kim dei shuh ban shim pisa ha ka por ilekshon, ka dei kaba bha palat hynrei lada ka long da kumwei pat ka dei ka dak kaba sniew ia ka jylla.”

Shuh shuh haba kylli, une u MP u la ong ba ha ka jingbishar bniah ka jong u, ka NPP kam shym la shah rem ha kane ka ilekshon tang namar ka rai jong ka BJP ban ai ia ka jingkyrshan kaba pura ia ka party.

“Ha ka jingbishar bniah ka jong nga kam dei satia ba ka BJP ka kyrshan ia ngi.Ngam ngeit satia. Balei nga ong ia kane namar ha u snem 2016 ym tang ka BJP kaba kyrshan ia ngi hynrei wat u Myntri ka Tnat Tribal Affairs ba mynta ruh u la iaid ialap ilekshon bad nga kumjuh u CM bad jop haduh jan 2 lak bad u la thaw ruh ia ka rekod hapoh Garo Hills,” u la bynrap.