Shah rai pynrem 2 ngut ki nongpyniap briew ha West Jaintia Hills

Syllad | The Rising MeghalayaApril 4, 2024

Hadien shiphew snem ba la ap ban ioh ia ka jingbishar kaba hok, ka iingbishar District and Sessions Judge, West Jaintia Hills District, Jowai ha ka 3 tarik mynta u bnai ka la rai pynrem ia u Salbinal Nangbah bad u Belting Tyngkra kiba dei na ka shnong Mynkrem da kaba set phatok shi jingim namar ka jingdonkti ha kaba pyniap dusmon ia u Prodic Nangbah uba dei na kajuh ka shnong ha ka jingjia kaba la jia naduh u bnai Jymmang 2014.

Na ka liang ka Kashari ka la dain kuna ruh ia kine ki arngut mar T.5000 bad hukum ba kin siew ia ka bai lutksan kaba T.300,000 lak sha kiba haiing hasem jong une u lanot.

Na ka liang u Superintendent of Police, WJH u la ong ba ki bor pulit ka Nartiang PIC ki la ioh pdiang ia ka jingujor ejahar ha ka 06.05.2014 halor ka jingshah pyniap dusmon jong u Prodic Nangbah ha ki laingut ki runar kiba kynthup ia u Chalbinal Nangbah, u  Salbinal Nangbah bad u  Belting Tyngkra.

Hadien kane la rejistar case katkum ka Jowai PS case No. 120(5)14 U/S 302/34 IPC, bad hadien ba la pynlong ia ka jingtohkit la chargesheet da u SI u Bah C Lamare.

Hynrei, katba dang iaid ka jingshim bishar uwei napdeng kitei ki laingut kiba la shah kynnoh donkti, kata u Chalbinal Nangbah u la khlad noh ha ka 6.04.2017.