Shah pom pyrthat 3 ngut kynthup u khynnah ba dang 1 snem ka rta ha East Jaiñtia

Syllad | The Rising MeghalayaApril 14, 2019

KHLIEHRIAT: Lai ngut ki khynnah kila shah pom pyrthat katba ki dang shong ha kawei ka ïing sher dara haka shnong Jalyiah Shiliangiarain, East Jaiñtia Hills.

Kane ka jingjia shah pom pyrthat kitei ki khynnah kala jia haka por 3:30 nohphaisngi ha ka Sngi U Blei ha kaba u pyrthat uba la kyrhuh ula pom hajan katei ka ïing bad ka ding kala sied sha kine ki khynnah.

La iathuh ba u ne u khynnah ba dang 1 snem ka rta, khun jong ka Hiel Dkhar kumjuh kawei ka khynnah kynthei bad dang 11 snem ka khun jong ka Mial Dkhar kila lait thaw na ka jingjia ba sngewsih bad kila mynsaw malu mala.

Katba uwei pat u khynnah shynrang u Phem Dkhar khun jong ka Mial ula mynsaw ding haka met jong u bad mar mar la kit ïa u sha Khliehriat CHC bad hadien la rah ïa u sha NEIGRIHMS ban ïoh ka jingsumar ba paka.

Nakaliang ka JSM (Jaintia Students’ Movement) kala dawa na ka bor district kumjuh na u MLA ka thain ba dei peit ïaka tnad Disaster Management ka sorkar jylla ban pynkloi ban pynioh lad jingiarap ïa kane ka longiing.