Shah lun maw ki iing ki sem ki nongkyrshan UDP ha Sahsniang, pynjari curfew u DM West Jaintia Hills

Syllad | The Rising MeghalayaMarch 2, 2023

Tang hadien bala dep iaka niew vote bad jop biang u kyrtong ka UDP ma Nujorki Sungoh kum u MLA,  ka Mowkaiaw Constituency ki nongkyrshan jong ka NPP kiba la khie bitar kila lun maw iaki iing ki sem jong ki paid nongkyrshan ka UDP ha Sahsniang haka sngi Palei.

Ka tyllong khubor ka iathuh ba ki nongkyrshan ka NPP ha Sahsniang kila pakhang iaka surok bad ki lynti syngkieng iaki nongkyrshan ka UDP bad pyni bor ruh wat iaki shipai CrPF kiba pahara ha katei ka shnong.

Dei hadien katto katne por kila lun maw iaki ïing ki sem jong ki nongkyrshan ki paid ka UDP. Kala don ruh ka jingthmu thang iaki trep kali motor.

La iathuh shuh shuh baka jinglong jingman ka shongsuk shongsain ha katei ka shnong kala shah ktah bad kiba bun ki nongkyrshan ka UDP kila hep ban phet rieh ialade sha ki jaka ba shngain.

Kane ka jingjia lun maw ha kane ka thain kam dei ka sien kaba nyngkong. Kumban shu pynkynmaw Ha u snem 2019 ruh haka elekshon MDC ruh kala jia haka shnong Mowkaiaw hadien bala jop u kyrtong ka UDP, ki nongkyrshan ka NPP kila pynjulor ia bun tylli ki iing ha Mowkaiaw.

Halor kane ka jingkynad ha Sahsniang u District Magistrate ka West Jaintia Hills District BS Sohliya ula pynjari da ka Curfew katkum ka kyndon aiñ kaba la pynkup ha u katkum ak section 144 CrPC tad haduh bala pynbna da kumwei.

U District Magistrate ula pynjari da ka curfew ban pynthikna ban pynjem iaka jingklumar bad ban pynneh iaka shongsuk shongsain ha katei ka jaka.