Shah leh klet ka thain Mawsynram haki kam pynroi: Ollan Singh Suin

Syllad | The Rising MeghalayaMay 10, 2023

U MLA ka Mawsynram u bah Ollan Singh Suin u la ong ba ka Mawsynram Constituency ka la shah leh klet bha ha kine ki snem ha ka liang ki kam pynroi bad kiba bun ki shnong ki bym pat poi surok satia haduh kine ki sngi.

U bah Ollan haba kren haka sngi ba Ar, ula jer ia ki katto katne ki shnong ki bym pat poi surok satia haduh kine bad ki don ruh kiba la poi hynrei ka long tang ban iaid ki kali Four Wheel katba kiwei ki kali, kim long ban iaid kum ka surok sha shnong Thieddieng.

“Ka shnong Nongrim, ka shnong Mawdon, ka Nongshluid, bad ha ka thain khappud ka Bangladesh kiba bun ki shnong kiba don surok ban iaid tang ha ka por tlang. Ka Thieddieng ka shu poi tang ka surok Four Wheel kaba long ban iaid tang haka por tlang hynrei mynta ka don ka jingpynrung skhim ban pynbha ia ka surok bad kyrmen ba kan long ha kawei ka sngi”, la ong u MLA ka Mawsynram.

Kawei ka pat ka mat kaba u MLA u la kut jingmut ban iasaid ka long ban pynbha bad pynheh ia ka surok sha thain Mawsynram ban khring ia ka kam jngohkai bad kum ia ka rep ka riang. Ka koit ka khiah bad ka jingdonkam ban ioh noh ia ka Mawsynram Civil Sub-Division kan dei kaba kongsan eh khnang ban kit ia ka synshar ka khadar kham shajan jong u paidbah.

“Ka Mawsynram Block ka dei kaba rim tam naduh u snem 1962 hynrei kiba hadien ki Block kila ioh ia ka Civil Sub-Division. Ki kyndon baroh kila biang lut ba ka Mawsynram kan ioh noh ia ka Civil Sub-Division khamtam ba ka dei ka thain kaba sahdien bha”, la ong u bah Ollan.

U la ong ba lada ka don ka Civil Sub-Division kan pynsuk shibun ia ki paidbah ka thain khappud kiba jngai da ki spah kilometer ban wan shaduh Shillong.