Shah kem u president ka NEHUSU haka jingshah shoh professor NEHU

Syllad | The Rising MeghalayaApril 28, 2025

U president ka North Eastern Hill University Students’ Union (NEHUSU) u Sandy Sohtun u la shah kem noh haka sngi Nyngkong halor ka jingshah kynnoh donkti ha kaba thombor bad byrngem pyniap ia u Assistant Professor ka skulbah u Dr Alok Singh.

Haba pynthikna ia kane, u Superintendent of Police ka East Khasi Hills u Bah Vivek Syiem u la pyntip ba la kem noh ia une u president ka NEHUSU hadien ka jingmudui ejahar pyrshah ia u da utei u Professor na ka Hindi Department.

Haba kylli, u SP u la ong ba ka jingtohkit ka la sdang bad ka jingthwet ban ioh kem ia kiwei pat kiba donkti ha kane ka kam thombor ka dang iaid shakhmat.

Lah ban kdew ba ha ka miet jong ka 24 tarik Iaiong ka kynhun jong kumba hynriew ngut ki samla pule ka NEHU ba la ialam da u president ka NEHUSU ki la leit rung jubor hapoh ka ophis treikam jong u hadien ba ki la thombor ia u kat haduh ba un da ngat ha ka jingmynsaw .

Ha kane ka jingjia la ong ba kine ki samla ki la khangkut ia u hapoh ka kamra jong ha kaba ki la thombor bad byrthen ruh ban pyniap ia u da kaba pynap da ka khanshi na u ryndang.