Shah kem u Finance Secretary ka seng lehnoh KCP(PWG) na Byrnihat, Ri Bhoi
Ki pulit ka Ri Bhoi ki la ioh ban kem noh ia u Finance Secretary ka Kangleipak Communist party (KCP) – People’s War Group (PWG) kaba dei ka seng lehnoh kaba la shah khein beain ka Manipur na Byrnihat, Ri Bhoi district.
U Khundongbam Herojit Meitei u la shah kem na kawei ka iingwai na ka shnong Nongthymmai, 15th Mile, Byrnihat halor ka donkti ha ki kam pyntriem kum ki kam dawa pisa bad kiwei kiwei ha kane ka jylla Meghalaya kumjuh ha ki jylla ba marjan hadien ka jingkhynra ba la pynlong da ka kynhun pulit na Ri Bhoi ha ka 21 tarik Iaiong ha ka por kumba 8:30 janmiet, ong u Superintendent of Police, u Vivekananda Rathore haka sngi ba Ar.
“Na u Meitei ki pulit ki la ioh ban kurup noh ia artylli ki mobile phone lem bad kiwei kiwei ki tiar ki tar. Ha ka jingtohkit u la pdiang ba u dei u dkhot jong ka kynhun KCP (PWG) bad ba u donkti ha kaba lum pisa beain na ka bynta kane ka kynhun,” ong u SP.
Kumba ka paw la iohi ba u Meitei u la wan shongtrieh tngen ha khappud ka Assam-Meghalaya ban lait na ka jingshah kem ha ki bor pahara kiba dang bteng mynta ban pynlong ia ki jingkhynra pyrshah ia ki kynhun seng lehnoh bapher bapher kiba donkti ha kaba pynthud ia ka jinglong jingman hapoh ka jylla Manipur.
“La suba ruh ba u donkti ha ki kam iasylla kam pyntriem bad ki katto katne ki kynhun seng lehnoh kiba treikam na Myanmar bad Nepal,” bynrap u SP.
La kem ia u ha u snem ba la dep na Manipur namar ka jingdon ia ka tiar siat beain bad ruh na Dimapur ha u snem 2018 namar ka jingdonkti ha ki kam khaii drok.
Mynta ki pulie ki la register case pyrshah ia u ha Nongpoh PS, bad ka jingtohkit ka dang iaid shakhmat.
Facebook
Instagram
Youtube
Twitter
Leave a Reply