Shah kem 5 ngut ki nong pomdieng haka khlaw lilam ka JHADC haka Forest Assam

Syllad | The Rising MeghalayaDecember 9, 2019

KHANDULI: San ngut ki briew kiba dei ki nong bylla pomdieng haka khlaw ba lilam ka Jaiñtia Hills Autonomous District Council (JHADC) kila shah kem ha ki nongtrei jong ka tnad Forest bad ki Pulit jong ka Sorkar Assam haka shnong Khanduli haka sngi Nyngkong.

Kine ki san ngut kiba shah kem ki dei u Chidame Pale, u Saibok Pyrtuh, u Vincent Dkhar, u Lamphrang Pyrtuh,  bad u Ripil Pyrtuh. Baroh kine ki san ngut ki dei na ka shnong Khanduli, West Jaiñtia Hills District.

Kane ka khlaw ba pomdieng kine ki san ngut ka dei ka khlaw kaba la die lilam ka JHADC sha u Lieh Sungoh uba naka Mynsngat naduh u Bnai nailar 2019. Kane ka khlaw ka dei ka khlaw kaba la tip kum ka Khliehlangho kaba la ri la sumar bad pynheh pynsan ïaki dieng da ka jingïatreilang bad ka Dorbar Shnong Khanduli.

Hynrei la kynnoh ba ki briew sorkar jong ka Assam kiba la wan da ka kynhun kila khang iaka jingpomdieng bad kam trai ïa katei ka jaka bad kem ïa kitei ki san ngut bad rah iaki sha Hamren.

U MDC jong ka Mynsngat Khanduli u ma Dawan Lyngdoh, ula pynpaw lka jingpyrshah kaba jur halor kane ka jingwan kam trai ka Assam ïa katei ka khlaw na ka por sha ka por bad ula dawa na u CEM JHADC ban pyllait ïa kitei ki san ngut naka sorkar Assam bad buria ïa baroh ki jinglut jingsep jong ki.

U Ma Dawan ula ong ba kane ka jingpomdieng ha katei ka khlaw kala sdang naduh u bnai Risaw, hynrei ka Assam kala wan pyndik bad kam trai ia katei ka jaka, katba ka Konsil haduh mynta mynne kam shym la pyni kino kino ki dak ki shin ba kan shimkhia ban iakren bad ka Sorkar Jylla lane bad ka Sorkar Assam halor ka jinglong trai ia katei ka jaka khlaw.

Une u MDC ula ong ba u CEM udei ban shimkhia ban iakren bad ka sorkar kumjuh ruh ban pynthikna ba katei ka jaka baka konsil ka lilam ka hap hapoh u pud u sam ka Jylla, khnang ba kan nym wanrah jingeh iaki paidbah ka thain khappud.