Shah kem 4 ngut kiba rong tuh iaka synduk pisa ka KJP Assembly Book Room Jowai

Syllad | The Rising MeghalayaDecember 30, 2022

Saw ngut ki briew kila shah kem noh ha ki pulit jong ka Jowai Police Station haka sngi Thohdieng halor ka jingdonkti jong ki ban kyndang iaka KJP Assembly Book Room, Jowai kaba don ha Iawmusiang bad rong tuh iaka synduk pisa nar.

Kine ki saw ngut kiba shah kem ki dei u Marwi Lyngdoh na Wahsanphaw Sohkymphor, u Emlang Lakhar na Nartiang, u Donborlang Manih na Paham Syiem, Nongpoh bad Eddy Dkhar na Mawkawah, West Khasi Hills District.

Kane ka jingjia shah kyndang tuh kane synduk pisa ka KJP Assembly Book Room kala jia haka 23 tarik une u bnai.

Hynnin ka sngi ki briew kiba iaid lynti kila iohi ia kane ka synduk bad pyntip mar mar sha ki pulit kila shimti ia kane ka synduk na nala ka lynti ban leit sha Dr Norman Tunnel Hospital, Jowai.

Ka khubor kaba iohlum kine ki runar kim shym la ioh sei iaka pisa kaba don hapoh kane ka synduk kaba la julor malu mala.

Halor kane ka jingiohkem ia kine ki briew ka jingtohkit ki pulit kala iaid shakhmat.