Shah kem 3 ngut ba niah kali shongshit hapdeng ka jingbuaid ha ki thain Laitumkhrah
Lai ngut ki khynnah kiba donkti ha kaba niah kali shongshit hapdeng ka jingdih buaid ha ryngkat ka jingpynheh iaka jingsawa ha Laitumkhrah, Shillong ki la shah kem noh ha ki bor pulit ka nongbah Shillong.
Na ka liang u Superintendent of Police,(City) East Khasi Hills, Shillong, u Bah Vivek Syiem, IPS u pyntip ba ha ka 1 tarik mynta u bnai, kawei ka kali Maruti 800 kaba lieh, ka bym don registration plate ne number la sakhi ha ka video katba ka dang iaid ha ka rukom kaba ima na ka jingle stunt ha ki bynta jong ka Laitumkhrah Police Point ha ryngkat ka jingpynheh jingtem. Kane ka kali la iohi ruh ba ka la tyngkhuh sha ka kynroh ha kitei ki bynta Police Point.
Hadien kane ka jingjia, la ujor suo-moto case da ki bor pulit ka Laitumkhrah Police Station katkum ka No. 105(12)2023 hapoh ki kyndon Section 279 ka IPC bad kiwei pat ki kyndon jong ka Motor Vehicle Act. Kane ka video ka la saphriang ruh lyngba ki social media ka la pynlong ruh ia ka Dorbar Shnong ka Laitumkhrah Pyllun ba kan ujor da ka FIR hapoh Laitumkhrah PS.
Haba pynlong ia ka jingtohkit ha kaba iadei bad katei ka kali bad ki briew kiba niah thurmur ki pulit katei ka PS hapoh ka jingialam jong u OC ki la lapdien ia kane ka kali napoh kawei ka jaka set ha ka thain Laitkor Kyntonumon.
Hadien kane la kem noh ia ki laingut ki khynnah kiba don bynta ha kane ka kam beain. Hadien la ioh jingtip ba ba kane ka kali ka don ia u registration No. ML05 U 4845.Baroh kine kiba la shah kynnoh donkti ha ryngkat kane ka kali la wanlam shapoh Laitumkhrah PS na ka bynta ban pynlong shuh shuh ia ka jingtohkit.
Hadien na ka liang ki bor pulit ki la maham bad kyntu ia kine ki khynnah ba kim dei shuh nangne shakhmat ban leh ia kiba kum kine ki kam beain namar ym tang ba ki buh jingma ia lade hynrei ia kiwei ruh ha ki lynti surok.
Ha kajuh ka por la kyntu ia ki paidbah ba ki dei ban aijingtip ia kiba kum kine ki jingleh kam beain da kaba phone sha u nombor 112.
Leave a Reply