Shah jied ka Riiohlang Dhar ban pyniaid ia ka AFC Women’s Champions League ha Wuhan, China

Syllad | The Rising MeghalayaApril 28, 2025

Lehse kan long ka jingsngew sarong ia ka Jylla hi baroh kawei hadien ba ka Kong Riiohlang Dhar kaba dei kawei na ki Referee kaba la paw bha na ka Jylla ka la shah pynrung ha ka thup jong ki Referee ha ki bor ba dei khmih jong ka AFC Women’s Champions League 2024/25 semifinal bad final.

Baroh ar ki jingialehkai kata semifinal bad final kan long ha sorbah Wuhan ka China haka 21 tarik bad ka 24 tarik u bnai Jymmang u ban wan.

Kaba kham sngewtynnad ban tip ka long ruh ba ka Kong Riiohlang ka la kylla long ka Referee kynthei ba nyngkong na ka Ri ki ban ioh ia kat kane ka burom ban shah jied ban ia don bynta ban ioh pyniaid ia kane ka lympung ialehkai football kaba heh jong ki kynthei.

Ka Kong Riiohlang ka la pynpaw sha ka lad pathai khubor ba ka la ioh pdiang ia kane ka khubor na Chairman AIFF Referee Committee jong ka ri.

Ka Riiohlang Dhar kum ka assistant referee ka FIFA kala ioh ban khmih bun tylli ki jingialehkai sha bar ri kynthup iaka FIFA U-17 Women’s World Cup 2024, ka AFC U-17 Women’s Asian Cup 2017 ha Indonesia, FIFA U-17 Women’s World Cup 2016 ha Jordan, AFC Women’s Asian Cup India 2022 – Qualifiers bad kiwei kiwei.