Shah iehbeiñ ka East Jaintia Hills ka district ba 11 ka Jylla, pynrem ka JSU

Syllad | The Rising MeghalayaNovember 11, 2021

Ka Jaintia Students’ Union (JSU) ka pynrem jur iaka sorkar MDA namar kane ka sorkar kam peit kam khmih iaka roi ka par jong ka East Jaintia Hills distrik kaba dei kawei na ki distrik kaba lah jan dap 10 snem mynta naduh ba lah phiah iaka na ka Jaintia Hills distrik ha u snem 2012.

Ka JSU lyngba ka Khliehriat Circle ka pynrem jur iaka jingiehbeiñ ka sorkar MDA iakane ka distrik wat la bun ki khajna ka mih na ka East Jaintia hynrei ka sorkar ka leh bym patiaw iaka hok u paitbah jong ka East Jaintia Hills Distrik. Ka JSU kam lah ban shu sngap jar halor kane ka bynta namar dang bun bah ka roi ka par kam pat don ha kane ka distrik namar ba wat tang Civil Hospital lane ka skul sorkar, kolej sorkar surok ban pyniasoh ia ki shnong bapher bapher ki dang long kiba khohruh khohram.

Haduh mynta ka surok ban pyniasoh iaka shnong Bataw sha Lama, Borghat sha Hingaria bad Huroi ka dang dei tang ka surok khlaw bad ka sorkar ka dang leh mynthi haduh mynta mynne ban pynbha iaki surok ki synkieng hapoh ka distrik.

Ka JSU ka phah iaka khubor sha ka sorkar jylla ba ymdei ban shu leh politiks ban phiah tang ki distrik hapoh ka jylla, hynrei ka sorkar kadei hok ban wanrah shuwa iaka roi ka par ha ki district ki ba lah rim ym ban pynlut por ban phiah distrik khlem da wanrah iaka roi ka par ban pynsuk ia u paitbah khamtam iaki nongkyndong.

Ka JSU kala ong kumba long mynta ka hospital civil kaba don ha Jowai ka khap ngiah namar ki nongshong shnong na East Jaintia Hills distrik kim pat don laka civil hospital bad ki khynnah pule na East Jaintia ki dang wan sha Jowai, West Jaintia Hills namar ym pat don ki jaka pule sorkar kiba paka haduh mynta bad dei naka ne ka daw ba bun na ki khynnah kim ioh ioh admission ha ki kolej.