Shah bat ka bus kaba wan na Dhaka ha Land Port Dawki, ioh kurup ki mar beain

Syllad | The Rising MeghalayaAugust 27, 2024

Ha ka jingkhynra kaba seisoh kaba iatreilang ka Land Port Authority Dawki, Land Custom Station Tamabil, Dawki bad ki BSF ha ka 26 tarik Nailar kila pynlong ka jingkhynra ha Land Port Dawki ia kawei ka bos kaba na Dhaka sha Shillong.

Ha kane ka jingkhynra kaba la wan long ruh hadien ka jingioh jingtip kaba thikna ka kynhun ka la lap ia ki artylli ki bynta ba buhrieh jong ka bus ia shibun bah ki tiar ki tar kiba kynthup ia ki jain saree, mobile phone, tiar rupa, tiar mobile, ki mashin niew pisa lem bad kiwei pat ki jait tiar.

Na ka liang ka Superintendent ka tnad Customs ka Kong Clara Nongrum ka pyntip ba halor kane ka jingioh kurup la kem noh ia laingut ki nong Bangladesh na ka bynta ban pynlong shuh shuh ia ka jingtohkit.

Katba ia ki 28 ngut ki briew kiba don hapoh katei ka bus la pynbiang ei ia ka bam ka dih lem bad kiwei pat ki jingdonkam da ki bor ba dei khmih jong ka Land Port bad ki nongshong shnong bad hadien la pynphai pat ia ki lyngba ki jaka khappud ka India -Bangladesh.

Haba pynpaw halor kane ka jingjia, u Manager ka Land Port Authority TC Chacko u la ong ba ki la ioh ia ka jingtip kaba bniah ba kane ka bus ka dei kaba la pyniaid da ka Shyamoli N.R. Travels na Dhaka sha Shillong bad Shillong sha Dhaka ka kit ia shibun ki mar.

Halor kane ka jingioh jingtip la pynlong ia ka jingtalasi ha kaba la lap ia ki artylli ki bynta ba la shna kyrpang, kawei hapoh jong ka chassis bad kawei pat ha ka bynta khrum jong ka bus ha kaba la buhrieh ia shibun bah ki mar ki mata.

Kine ki tiar ba la ioh kurup ki kynthup ia kumba 30 kilo ka rupa, kumba 180 tylli ki Banarasi saree bad 110 tylli ki mobile bad kiwei pat. Hadien ba la jurip bniah la aiti noh sha ka tnad Custom ha kaba iadei bad ki sienjam ban kurup noh ia kine ki mar.

U Chacko u la bynrap ruh ba lada kine ki mar ba la ioh kurup lada kin shongdor palat ia ka T.50 lak, yn kem ia kiba donkti katkum ki kyndon ain jong ka tnad custom.