Sdang ki shi kynum ban pyllait MLA skim ha Jaiñtia 2 ki MDC na pla lajong

Syllad | The Rising MeghalayaApril 11, 2020

Hadien ba ka sorkar kala mynjur ban pyllait T.25 lak na ka MLA skim ia baroh ki MLA ha Jylla ban ïarap ïaki paidbah haka jingiakhun pyrshah iaka khlam COVID-19 ban pynioh marbam bad kiwei kiwei ki jingiarap ïaki paidbah ha constituency ha kane ka por ba khang khyrdep, phewse na Rilum Jaintia la mih ne sdang shuwa tang da ki 2 ngut ki MLA ban pyndonkam ïa kane ka lad ban iarap ia u paidbah.

Kine ki ar ngut ki MLA na Rilum Jaiñtia kidei u MLA Jowai u ma Wailadmiki Shylla bad u Ma Sniawbhalang Dhar MLA ka Nartiang kiba dei shikynum.

Kiwei pat nongmihkhmat ne ki MDC wat hadpeng ka jinghiran ka pla tyngka jong ka JHADC bad ym ioh MDC skim, la mih shakhmat ar ngut ki MDC kata u Lasky Rymbai na ka thain Tuber uba long ruh u Deputy CEM, JHADC bad u Ma Gillroy Tariang MDC War East.

U Ma Gillroy Tariang MDC ka War East uba la aiti ia u khaw sha ki nongialam shnong ka Elaka Satpator ban sam sha ki paidbah ka thain

U Lasky Rymbai katba dang sam khaw ha ka thain Tuber

U MLA jong ka Jowai ula sam shuwa sha ki thain nongkyndong haka sngi Saitjain ha ki 10 tylli ki shnong ba kynthup iaka Mukhla, Khliehtyrshi, Mihmyntdu, Sabahmuswang, Ialong, Sohmynting, Madur, Niriang, Loomkudung bad Plongingkhaw. La shai ka sngi u sam sha ki jaka sor bad khapsor.

Katba u MLA jong ka Nartiang ula sam ha ka shnong Modop bad Nartiang.

Kiba bun ki paidbah ha ki thain nongkyndong kila pynpaw ka jingsngewnguh kine ki MLA bad MDC kiba la mih shakhmat ban iarap iaki ha kum kane ka por ba kyrduh khaw namar ka jingkhang khyrdep bad ka jingshimkabu ki nongdie khaw wat hapdeng ka jingiakhun pyrshah iaka khlam COVID-19.