Sdang ka NHAI ia ki jingtrei bad maramot ia ka surok NH-6 na Lumshnong sha Malidor

Syllad | The Rising MeghalayaNovember 27, 2024

Haba bud ryntih ia ka hukum ba la pynmih da ka iingbishar Meghalaya High Court, ka National Highway Authority of India (NHAI) ka la sdang pura ia ka jingtrei bad maramot ia ka surok bah National Highway-6 (NH6) na Lumshnong shaduh Malidor ha East Jaintia Hills District.

Hynrei, khnang ban pynthikna ban pyndep kham kloi ia ki jingtei bad maramot ia kane ka surok bah NH6 kaba la jot rathai, la pyntreikam ia ki katto katne ki kyndon kiba iadei bad ka jingiaid jong ki kali ha ka jingiatreilang ki bor pulit bad u Project Director, NHAI ha ki jaka ba la kdew da ki heh jong ka NHAI ia kiba yn pyntreikam mardor, ong ka jingai jingmut ba la pynmih da u Deputy Commissioner bad Chairman Disaster Management Authority, East Jaintia Hills District.

Katkum kane ka jingbthah, ki kali rit (LMV) na ka bynta ki paidbah ki lah ban iaid da ka jingpyniaid kaba biang ha baroh arliang surok, katba ki kali heh (HMVs) ki lah ban iaid tang shiliang surok ryngkat ka jingbud ia ki kyndon hapoh ka jingkhmih jong ki bor pulit kiba don ha ka kam.

Ha baroh ki bynta jong ki jaka kiba dang iaid ka jingpyntrei, ka NHAI kan buh ia ki jingpyni dak na ka bynta ka jingshai ha ka por mynmiet khnang ban lait na kino kino ki jingjia ba sngewsih hapdeng ka jingiaid shakhmat ha ka jingpyntei ia ka kam. Lah ruh ban buh ia ki Signboard/Warning Signange kiba biang ha ki jaka ba kongsan kiba dang pyntrei khnang ban lah ban iohi shai da ki paidbah ia kino kino ki jaka ba don jingma, kata kum ha ki jingkieng, ki thliew nala um ne culvert, ki thliew ki syar kiba heh ne potholes bad kiwei kiwei.

U Deputy Commissioner u la pyntip lada donkam ban khang dam pura ia ka surok, ka donkam ia ka NHAI kaba pyntrei  ka dei ban iatreilang bad u Nodal Officer ka Tnad Pulit ryngkat ka jingpyntip lypa kaba biang khnang ban pynthikna ba kan ym don than ka jingthud ha ka leit ka wan jong ki paidbah.

Ha baroh kane ka jingtreikam ba la kdew ka dei ban don ka jingiatreilang kaba thikna hapdeng u Superintendent of Police bad u Project Director, NHAI khnang ba kan ym don kano kano ka jingjia ba sngewsih bad ban pynsuk ia ka leit ka wan jong ki paidbah.