Sdang ka lehniam Behdieñkhlam ka Seiñraij Tuber, yn shah tang 23 ngut na kawei ka shnong bad kiba la dep ai tika COVID-19

Syllad | The Rising MeghalayaJuly 17, 2021

Ka Behdieñkhlam jong ka Seinraij Tuber kala sdang haka 16 tarik une u bnai da kaba bud ryntih iaki adong adit COVID-19.

Kane ka Behdieñkhlam kaba heh tam ha Rilum Jaintia kan kut haka 19 tarik une u bnai bad na kaliang ka Seiñraij Tuber kala dep pynbna ruh iaka kyndon ne SOPs ban iashimbynta ha kane ka Behdieñkhlam ban tem iaka jingpur ka khlam COVID-19.

Katkum ka SOPs la shah tang 23 ngut ki Wasan na kawei kawei ka shnong ban iashimbynta naduh ka shnong kaba ki wan haduh ha Tuber bad kine ki Wasan ki dei ruh ban pyndep iaka jingai tika COVID-19.

U President Seiñraij u ma Harvis Phawa ula ong ba baroh kiba iashimbynta ki dei ban deng iaki mask bad la khang pyrshah ban ia pajut kti bad ban ia kdup lait tang ki nongiashimbynta haka jingïasleit ne ïalympat ha ka jinglehniam ha ka syiem Aitnar ne ka biar blai.

La khang ban die jingdie kynthup iaki nongdie kyiad, la khang ruh ban bam kwai, dih duma bad ban bynthiew umbiah kat shaba lap bashem.

“Baroh ki shnong kiba wan iashimbynta ki dei ban pynbiang iaka hand sanitizer bad tang ia kito kiba ioh jingbit n aka Seinraij kiba lah ban rung sha ki jaka lehniam,” la ong u president Seiñraij Tuber ma Harvis Phawa.

Kumba ju long la sdang iaka Behdieñkhlam da ka lehniam kaba la tip kum ka ‘Ku Neiñ’ ha kaba ki khun ka raij Tuber kiba na ka phang wah ne kiba sharum kin kiew sha ka phang neiñ bad hadien ba kila kynduh ha ka jaka ba long pdeng kila iashad sngewbha ha ryngkat ka jingsawa ka bom ka tangmuri.

La shai ka sngi 17 tarik ka phang Nein kan hiar sha ka phang wah ban iashad sngewbha sha ki ïing ki sem kiba dang ksoh iaka Niam haka phang wah.

Haka 18 tarik pat dang step phyrngap u Langdoh ka niam ryngkat bad ki nongïalam jong ka Niamtre ka raij Tuber, kila leit sha khloo blai ne law kyntang bad ai ka nguh ka dem ïaki Ryngkew ki Basa ka raij Tuber. Ka jingpyndep niam kaba bud pat ka dei ka jingwan rah ïa ‘ki bhang’ sha ka Biar Tuber Kmai Chnong da ki ar bynta jong ka shnong, kata ka phang Neiñ bad ka phang ‘Wah’.

Ha ka sngi kaba khatduh ka 19 tarik pat ki Langdoh, ki Wasan kim pyndep iaka knia beh khlam pynbud saka Behdieñkhlam , ka iaboh bad ka iatan bhang, ka Iasleit niam ki Wasan.

Shuh shuh ki Langdoh ki Wasan kin ai pyrnah sha ki dong kiba shna rong bad haka por shiteng sngi ki Seinraij bapher bapher kin rah iaki rong ban leit bret ha syiem aitnar ryngkat ka shad bad hadien bala dep yn pynbud biang sha ka Iasleit hapdeng ka phang wah bad ka phang nein kaba la ngeit ba lada jop ka phang nein kin ioh iaka koit ka khiah bad bha ki jingthung jingtep bad lada jop ka phang wah ba jem u snem u bnai