Sdang ka jingrakhe dap 75 snem ka Dorbar Shnong Khimusniang

Syllad | The Rising MeghalayaJanuary 6, 2024

Ka Dorbar Shnong Khimusniang haka 6 tarik Kyllalyngkot ka la sdang iaka jingrakhe dap 75 snem ne ka Platinum Jubilee (1949-2024) jong ka jingiaid lynti ka shnong Khimusniang. Ia kane ka shnong la seng shnong da ki 16 ngut ki riew rangbah jong ka shnong.

Ia kane ka platinum jubilee yn rakhe ha baroh shi snem lynter bad yn pynkut haka 31 tarik Nohprah 2024. U kongsan uba plie ia kane ka jubili u dei u Chief Forest Officer, JHADC bad u dei ruh u waheh shnong barim ka Dorbar Shnong Khimusniang u Ma Frankie Well Blah haka jingdonlang u President ka Synjuk Waheh Shnong Jowai Ma Jlan Kupar Rymbai kum u synbud kongsan.

U Ma Blah haba kren ula ong ruh ba haki por ka jingbat jong u kum Waheh Shnong ka jingiatreilang hapdeng ki nongialam shnong, ki longkmie longkpa bad ki samla ka dang don haduh ba la lah ban pyniaid shakhmat ia kiba bun ki kam kumjuh ki kam pynroi pynpar hapoh ka Shnong kam thaw. Haba phai pat sha kane ka juk kaba mynta, ka jingialam jong ki longshwa manshwa i kumba kan jah noh. “Lada phai haka liang ki khun samla kim treh shuh ban kit ban bah iaka khia ka shon jong ka shnong ka thaw bad haki jingdonkam jong ka shnong hap ban kyrpad da ki bun bunsien ban iadon bynta lang khnang ban lah ban pyndep bad pyniaid shakhmat iaki kam,” la ong u Ma Blah.

Kumta ula kyntu ia baroh ki khun ka shnong ban iatreilang bad ka shnong ha kino kino ki kam khnang ba ka dorbar Shnong kan nanglah ban nangpynkhlain shuh shuh iaka rukom treikam na ka bynta ka bha ka miat jong ki nongshong Shnong.

U kongsan hadien ula plie ruh ia u maw sahnam jong ka jinglehkmen iaka platinum jubilee katba u symbud kongsan ula plie pyrda ia Mascot kaba dei ka dak jong ka jingrakhe 75 snem ka shnong bad ia kane ka dur Muscot la pynwandur da ka samla Wansaka E Hinge.

Shwa ka jingialang la ioh iaka jingduwai na u Pastor E Nongpluh bad la ioh ka jingkren pdiang na u Ma J.M. Pohsngap. Ia ka history ka shnong la pynsngew da u Ma NK Lamare uba dei ruh u Chairman jong ka Souvenir Committee bad na u Waheh Shnong Ma A Lamare.

La pynphuh pynphieng iaka jinglehkmen Platinum Jubilee da ki jingrwai jingshad ba la shim bynta da ki khynnah bad samla ka shnong Khimusniang. La iadonlang ki Waheh Shnong na ki shnong bapher ka sor Jowai, ki riew rangbah ka shnong, ki longkmie longkpa, ki samla nalor kiwei de kiba shah khot sngewbha.