Sdang ka jinglehkmen jubili rupa ka skul Loompyrdi Iongpiah UPS, Jowai

Syllad | The Rising MeghalayaAugust 28, 2024

Shibynta ka jinglehkmen Silver Jubilee Celebration ne jubili rupa, ka Loompyrdi Iongpiah Upper Primary School (UPS) kala pynlong da ki jingkop kyrpang kynthup ka Cultural Programme, Essay Writing, Drawing-Painting, Quiz bad ka Short Play Competition.

Ia kane ka prokram la pynlong haka 27 tarik bad kan kut haka 30 tarik Nailar ha ïungwalieh Loompyrdi Iongpiah haka jingdonlang u kongsan Awhai Andrew Shullai MDC JHADC, u Saron Paswet, MDC Jowai South, u waheh shnong Loompyrdi Iongpiah RL Bimee Suwer, Headteacher Loompyrdi Iongpiah UPS Nitu Shullai nalor kiwei kiwei.

Iaka jingialang la pyniaid da u Ribeit O Pde, Chairman Organising Committee bad la nguh blei da ka Really Rymbai, Assistant Teacher, ka jingkren lyngkot shaphang ka jingiaid lynti jong ka skul la pynsngew da u C Tympang Laloo, Chairman SMC Loompyrdi Iongpiah bad haba kut ka jingialang u Barleymore Shylla, Secretary Organisng Committee ula ai ki kyntien khublei.

U Saron Paswet haka jingkren ula ong ka jingiaid lynti ka skul haki 25 tylli ki snem kam long kaba suk hynrei da ka jingtrei shitom ka Dorbar Shnong ryngkat ka SMC kumjuh ki nonghikai ka long ka burom kaba khrwa bad ba ka skul kala ioh ban lehkmen ia u maw mer ba 25 snem.

Shuh shuh ula ong, hapdeng kine ki 25 tylli ki snem ka skul kala lah ban sei bad pynmih shibun ki khynnah kiba don mynta haki kyrdan pule bapher bapher bad u khmih lynti ba ha ki sngi ki snem ban wan ka Loompyrdi Iongpiah UPS kan nanglah ban bteng iaka jingshakri iaka shnong ka thaw kumjuh iaka District haki kyrdan pule kiba kham shalor.

U Awhai Andrew Shullai haka jingkren ula iaroh iaka Dorbar Shnong kaba la iohi jngai bad sdang ia kane ka skul kaba dei ka shlem ai jinghikai kaba la iaid shakhmat katkum ka juk ka por kaba mynta.

Ha kaba iadei bad u nonghikai u Andrew ula ong, nalor ki jinghikai haka pule puthi kaba kyrpang ka long ban saindur iaki khynnah ha kaba iadei bad ka longbriew manbriew khnang ba ki khynnah kiba mih na kane ka skul kin long ki khynnah kiba don ka jingkitkhlieh na ka bynta ka bha ka miat jong ka ka imlang sahlang, ka iing ka sem, ka shnong ka thaw kumjuh ka ri bad ka jaitbynriew.

La pynshong shit shuh shuh iaka jingialang da ki jingiakop shad tynrai kumjuh ka jingpyni riam tynrai kaba long shibynta ka prokram ban khring iaka pyrkhat pyrdain jong ki khynnah khnang ba kin nang ban kheinkor bad ieid ia la ka riam ka beit la jong.