Sangeh ban leh kum ka Taliban, wat kob ban synshar ia ka Meghalaya: Prestone

Syllad | The Rising MeghalayaApril 12, 2024

U State President ka National People’s Party (NPP) uba dei ruh u Symbud Myntri Rangbah ka Jylla, u Bah Prestone Tynsong u la kynnoh ia ka liang pyrshah Voice of the People’s Party (VPP) ba ka la leh kum ka kynhun Taliban ha ki jingialap ilekshon jong ka.

Haba kynthoh tyngeh ia ka VPP halor ka politik jong ka jingpyniashun, u Bah Prestone u la ong, “Nga la sakhi ia ki jingkren ki jong ki. Ha kaba nyngkong ki la kren ia ka jingburom ia baroh ki jait niam, hynrei ha ka por ialap ilekshon ki jingleh ki jong ki, Nga la iohi ba ki long kum ka kynhun Taliban kaba la kurup ia ka Afghanistan, kaba ngi khot ka Taliban.”

“Ka Taliban mynta ka la synshar ia ka Afghanistan bad mynta kaei kaba la jia ha kane ka ri, phi iohi halor ka jingkhanglad ia ki lad pathai khubor. Nalor kata wat ia khynnah kynthei ruh ki la shah khanglad ba kin leit skul palat ia ka matrik,” la ong u Bah Prestone.

“Ka mat kaba nga sngewkhia jur ka dei halor ka rukom pyrkhat bad ia ka jinglong jong ki nongialam ka VPP, namar ki briew kiba nud ban ong ba kiwei ki dei kiba bakla bad ba tang ma ki, ki dei kiba riewkhuid kane hi ka pynpaw ba ka don ka jingbym biang ha ki. Kumta ki paidbah ki dei ban bishar bniah halor kane namar ka dei ka kam kaba ktah jur khamtam haba khmih ha kaba iadei bad ka rukom ialap ilekshon ka jong ki,” u la ong.

Kane ka jingpynpaw jong u Bah Prestone ka la wan long ruh ar sngi hadien ba ka VPP ka la ioh pdiang da ki artylli ki show cause notice namar ka jingpyrshang ban pynthut ia ki jingialang ialap ilekshon jong ka party National People’s Party (NPP).

Haba kynthoh ia ka jingkren kob jong ka VPP, u Bah Prestone u la ong, “Ki sngew ba dei tang ki Khasi ne ki paid ka Bri u Hynniewtrep kiba lah ban ialam shakhmat ia ka Jylla, hynrei Nga sngew ba kane kam dei ka por ia ki ban kren namar kum ba kdew uwei u riew rangbah ba ka VPP ka dei ka party kaba kut tang ha kawei ka District bad kaba don tang hapoh East Khasi Hills.

Nalor kata u Bah Tynsong u la kob ruh ia ka VPP da kaba ong, “Lada phi sngew ba ka party jong phi ka khlain haduh katta katta, balei ba kim pynieng kyrtong sha Garo Hills. Kata ka mut ba phi pynleit jingmut tang ha Rilum Khasi Jaintia hynrei phi kren kob ba phin synshar ia ka Meghalaya baroh kawei tang namar ba phi ieit jaidbynriew.”

“Hynrei Nga ong iaphi ba haba ngi kren halor ka jingburom ia baroh ki jait niam, peit ka Meghalaya kam lah satia ban pynmih khajna wat tang 10 percent bad dei na kata ka daw ngi dang hap ban shaniah tylli na ka sorkar pdeng. Ka long kaba biang lada kino kino ki party kin synshar hapoh ka sorkar pdeng, hynrei ia ki Jylla ka thain shatei lammihngi (North East) lait noh ka Assam kaba la lah ban tam ia ka 20-25 percent ka jingpynmih khajna, ngi kiwei pat ki Jylla ka thain ngi hap ban shaniah tylli ia ka jingpynmih pisa, skhim, ki  lad jingiarap na ka sorkar pdeng. Kumta sangeh ban kren kob, namar kam don jingmut, kata kumba nga ong ngi la iohi bad ngi la pyrshang ia kaba bha tam ban pynkhlain ia ki lad pynmih pisa hynrei ym don lad ym don lynti satia.Lada phi kren ia ki kam karkhana, hangno ngi don ia ki karkhana heh lait noh tang ki katto katne ki karkhana dewbilat.Kane ka dei kawei na ki mat ne ishu kaba ngi iakynduh jingeh,” u la ong.

Shuh shuh haba kyrpad ia ki paidbah ba kim dei ban ngop ha kiba kum kine ki party sain pyrthei, une u nongialam ka NPP u la batai lypa ruh ba ka VPP ka dei ka party ka ban sa jah rngai ha kasno kano ka por ha Meghalaya.