San sngi lynter yn tohkit ki Pulit iaki 3 ngut ki suba pyniap ia u Pynkhreh Surong

Syllad | The Rising MeghalayaMarch 29, 2023

Ki Pulit jong ka Jowai Police Station kila ioh bor na ka iingbishar ban tohkit haduh san sngi lynter iaki lai ngut ki suba donkti ban pyniap ia u Pynkhreh Surong bad rahbor iaka kali jong u.

Kine ki lai ngut ki suba pyniap briew ki dei u Jimmy Kyndait uba na Moorap uba la shah kem haka 28 tarik Lber bad ar ngut kiwei pat kiba la shah kem haka 21 tarik Lber kiba kynthup ia u para u I Love You, u Meban Talang na Moorap bad u Sambun Dkhar na Mynsngat.

Ka khubor kaba iohlum, ki Pulit jong Jowai Police Station haka sngi Balang kila rah iaki lai ngut kiba shah kem sha iingbishar District and Session Court, Jowai bad na kaliang jong ka ïingbishar kala ai jingbor iaki pulit ban pynlong iaka jingtohkit ki pulit (Police Custody) san sngi lynter.

Kine ki lai ngut ki suba pyniap briew, la kynnoh ba kila rahbor bad pyniap ia u Pynkhreh Surong naduh ka 9 tarik u bnai Lber.

Kumban shu pynkynmaw ba kiba haiing jong u Pynkhreh Surong kila mudui da ka ejahar ha Nartiang Police Station haka 21 tarik Lber 2023 ba u Pynkhreh Surong ula jah rngai ryngkat bad ka kali Mahindra Pick Up. Dei haka step 22 tarik Lber kiba ha iing jong u kila ioh jingtip ba u Pynkhreh ula shah pyniap dusmon.

Ki pulit kila ioh ia ka met kaba sah u Pynkhreh Surong da ka jingialam jong u para jong u I Love You, u Meban Talang naka shnong Pommura kham pajih na ka surok bah haka jaka khlaw, kaba hap ha Mawryngkneng Police Station.

Hadien kane ka jingiohkem ia u Meban Talang bad u Sambun, ki pulit kila iohkem ia u Jimmy Kyndait. Ki Pulit kila ioh biang iaka kali Mahindra pick up u Pynkhreh Surong na ka shnong Tyrsad, East Khasi Hills District.

Ka khubor ka iathuh ba kane ka jingshah pyniap ia u Pynkreh Surong ka dei kaba isaylla da ki bun ngut ne ka kynhun ki runar.