Sam symbai ka tnad Horticulture ha Thadlaskein Block, ai khublei ka HFU

Syllad | The Rising MeghalayaJune 19, 2021

Ka tnad Horticulture, West Jaintia Hills District kala sam iaki symbai naduh Sohsaw, Sohkhia, Kubi bad Shynrai bad kiwei de  sha ki paid nongrep kiba hap ha Thadlaskein Block.

Halor kane na kaliang ka Hill’s Farmer Union (HFU), Thadlaskein Block Unit, West Jaintia Hills District ka ai khublei kyrpang ia ki officer bad ki nongtrei jong ka Tnad kiba la sam ia kine ki symbai sha ki nongrep ka thain.

U President ka HFU Thadlaskein Block, u Mutshwa Thabah, ha ka sngi ba sam ia ki symbai sha ki nongrep na ki shnong bapher bapher jong ka Thadlaskein Block, u la kyntu ia ki nongrep ba ki dei ban long ki ba trei shitom bad ban rep katkum ka juk stad thymmai ba mynta khnang ba kan pynioh nong shuh shuh ia ki nongrep.

U la pynshlur ruh ia ki nongrep ban ia leh katba lah ban rep da ka sboh organic khnang ba kan iada ia ka khyndew.

Ka tnad Horticulture ka la sam ei haduh 15 ton u Symbai Shynrai (Lakadong Turmeric) sha ki nongrep na ki shnong bapher bapher lyngba ka Hill’s Farmer Union Thadlasdkein Block.

Shuh shuh nakaliang u Secretary jong ka HFU Thadlaskein Block, Chanbor Rymbai, u la kyntu ia ki nongrep ba ki dei ban pynmyllien ban iit ia ki jingthung ki ba lah ban pynmih pisa khambun bad ruh ki ba lah ban rep khlem da pyndonkam ia ki dawai ba long bih ban neh ka sboh jong ka khyndew bad la kyntu iaki nongrepp kiba ia kynduh jingeh kum ha ka jingshah  pynjulor ha ki khniang bad kiwei de ban pyntip sha ka HFU ban rah pynsngew sha ki tnad ba dei peit.