Sam marbam ka shnong Moodymmai sha ki 200 tylli ki longïing

Syllad | The Rising MeghalayaJune 22, 2021

Ka shnong Moodymmai hapoh ka jingïalam jong u Waheh shnong u Ma Joseph Pariat ryngkat ka jingïadonlang ki nongkitkam jong ka Dorbar shnong kila sam da u khaw bad ka song pisa sha ki 200 tylli ki longïing jong ka shnong.

Hashwa ban sam ïa u khaw la don ka jingïalang lyngkot ha kaba u Waheh Shnong u Joseph Pariat ula ïathuh ba ka dorbar shnong haka jingshong jingïalang kaba kyrkieh kala rai ban synñiang da u khaw bad pisa khnang ban ïarap ïaki longïing jong ka shnong kiba donkam shisha ka jingïarap haka por kum kane.

U General Secretary shnong u Haunihiwot Pariat ula pynpaw ka jingsngewnguh ïa baroh ki nongshong shnong kiba la noh kylluid mynsiem na ka bynta ban thied ïa u khaw bad ban pynlong ïaka jingthmu jong ka dorbar shnong kaba jop.

Ka dorbar shnong ka la kyntu ïaki khun jong ka shnong ban long kiba husiar bad ban bud ryntieh ïaki kyndon ïada COVID katkum ba la bthah da ka tnad ka koit ka khiah.