Sam jingtip ki samla pule Physics ka Kiang Nangbah sha ki khynnah pule Science

Syllad | The Rising MeghalayaMay 4, 2023

Ka tnad Physics jong ka Kiang Nangbah Govt. College, Jowai, kala pynlong ïaka programme ai jinghikai Practical Demonstration ne kaba leh bad pyni ha skul KJP Synod Higher Secondary School, Jowai haka sngi Balang.

Ka jingthmu jong kane ka programme ka long ban ai lad ïaki khynnah ba pule haka kyrdan BSc 6th Semester (Physics Honours) ba kin ai jinghikai ïaki jinglap jingshem jong ki iaka sobjek Physics kaba kila dep pule sha ki khynnah pule klas XII Science jong katei ka skul bad kumjuh ban ïarap ïaki ban ïoh mynsiem ban nangtrei shitom bad ban sngewthuh kham bniah ïaka bynta ka ba ki la ïoh jinghikai.

Ïa kane ka programme la sdang da ka jingïalang ba la pynïaid da u T Bamon, HOD Physics Dept. KNGCollege, Jowai. La ïoh ruh ka jingkren lyngkot na u HWD Passah, Vice-Principal, K.J.P Synod Hr. Sec. School, Jowai na ka Kong P. Mukhim, Associate Prof. KNG College, Jowai bad na u R Nanghuloo, Asst. Prof KNG College, Jowai.

Hadien ka jingïalang ki khynnah pule B.Sc 6th Semester jong ka KNG.College, Jowai ki la ai ka jinghikai Practical Demonstration sha ki khynnah klas XII Science jong ka K.J.P Synod Higher Secondary School, Jowai.

Kiwei de kiba la ai jingkren ki long u Precious Sten B.Sc. 6th Semester uba la batai ïaka jinglap jong u, ha kaba ïa dei bad kane ka prokram bad ki jingpule jong u ha kaba ïadei bad kane ka subject kumjuh na ka Knerlang Paslieñ, klas XII Science, K.J.P Synod Higher Secondary School, Jowai kala kren halor kane ka prokram bad ki kyntien ai khublei na u Dr. D. Suchiang, Asst. Prof. KNG.College, Jowai.

Ha kane ka prokram la ailad ïa baroh ki khynnah pule klas XII Science jong kane ka skul ban pynsngew iaka jinglap jong ki halor kane ka demonstration bad ban ai marks ïaki khynnah BSc 6th Semester lyngba ki feedback form bad Score sheet.