Rung quarter final ka Mawsiang & Pasyih haka Third Div ka WJDSA

Syllad | The Rising MeghalayaMay 7, 2022

Ka Mawsiang FC Nongkhroh bad ka Pasyih CSC kila rung sha ka kyrdan jong ka quarter final haka Third Division Football- Ka 2nd Adelbert Laloo Memorial Trophy jong ka West Jaintia District Sports Association (WJDSA).

Kane kala wan hadien ba ka Mawsiang kala pynliem da 2-1 iaka Lumchyrmang Mihmyntdu bad ka Pasyih kala jop da 2-0 kol iaka Pateinki Sabah kaba long ha Kiang Nangbah Stadium haka sngi Saitjain.

Kine ki ar tylli ki jingiakhun ki dei kiba khatduh jong ka pre quarter final bad ka quarterfinal kan sdang ha ka taiew ban wan ka tarik ym pat pynthikna.

Haba phai sha ka jingiakhun ka Mawsiang pyrshah iaka Lumchyrmang, ka Lumchyrmang kala tam shakhmat da ka kol kaba la thep u William Rymbai (7) bad tang hadien katto katne minit ka Mawsiang kala tan kylla iaka jingiakhun sha kaba iakhaid lyngba ka kol kaba la thep u Snowel Kharsati (13). Ka kol kaba ar la thep da u Rio Myrboh (65) haka kylla miet kaba la biang pura iaka Mawsiang ban khur iaka nam jop.

Ha ka jingiakhun ka Pasyih pyrshah iaka Pateinki baroh ar kol kila mih paw haka kylla miet. Ia kine ki ar kol la thep mar shikol da u Shiningstar Rymbai (64) bad Phem Dkhar (79) kaba la biang pura iaka Pasyih ban khur nam jop ban rung sha ka quarter final.