Risa leh kmen ka thain Shatei Lammihngi ba pulom ka CAB; Maham bad ai Khublei ka NESO

Syllad | The Rising MeghalayaFebruary 13, 2019

SHILLONG: Baroh kawei ka thaiñ Shatei Lammihngi kala risa bad lehkmen halor ka jingpulom noh ka jingthmu ka sorkar BJP ban wanrah ïa ka Citizenship Amendment Bill (CAB) 2016 ha Rajya Sabha.

Ka North East Students Organization (NESO) kala maham ïa ka Sorkar Kmie ban nym shna ne pyntreikam ïa ki polsi kiba long pyrshah ia ka bha ka miat jong ki paidbah ka thain Shatei Lammihngi.

Ka NESO ka kynthup ia ka Khasi Students’ Union (KSU), ka All Assam Students’ Union (AASU), ka Naga Students Federation (NSF), ka Mizo Zirlai Pawl (MZP), ka Twipra Students’ Federation (TSF), ka All Manipur Students’ Union (AMSU), ka Garo Students’ Union (GSU) bad ka All Arunachal Pradesh Students’ Union (AAPSU).

“Lyngba ka jingiatylli bad jingshitrem jong ki sengbhalang, ka jingthmu jong ka Sorkar Kmie ban wanrah iaka CAB ha Rajya Sabha ka la pulom,” ong ka NESO haba ai khublei ia ka paidbah jong ka thain Shatei Lammihngi bad ka la ong ruh ba kane ka dei ka jingjop jong ki kiba la ia long tylli.

Ka NESO kala ai jingiaroh ia ki seng baroh hapoh jong ka shatri jong ka NESO kiba la trei shitom bad len ialade na ka bynta ban pyrshah ia kane ka bill, ka NESO ka ai khublei ia ki sorkar jylla bapher bapher jong ki Jylla ha ka thain Shatei Lammihngi kiba la ieng shlur ban pyrshah ia ka sorkar kmie khamtam ia ka Sorkar Meghalaya ha ka jingialam u Conrad K Sangma bad ka Sorkar Mizoram ha ka jingialam jong u Zoramthanga bad ki sengbhalang bapher bapher, ki seng longkmie bad kiwei kiwei de.

Ka NESO ka ai khublei ia u Nitish Kumar Myntri Rangbah jong ka Bihar bad ia ka party jong u ka JDU kiba la rai ban pyrshah ia ka CAB ha ka National Executive Council bad ka Seng ka ai khublei ruh ia ki seng sain hima sima bapher bapher kum Shiv Sena, Congress (I), SP, BJD, TMC, DMK, SAD, NPP, AGP, TDP, BPF bad kiwei de kiba la pyrshah ia ka CAB.

Ka NESO ka kitbok kitrwiang ia ki briew kiba la mynsaw kum ha Tripura, Manipur bad Assam ba kin jem noh kloi bad ka ong ba ka jingshah shitom jong ki kam shym long lehnohei.