Rakhe ka WWO Seinraij Jowai ïaka sngi kyrpang ki kynthei

Syllad | The Rising MeghalayaMarch 8, 2023

Ka Women’s Welfare Organisation Seinraij, Jowai kala snohkti lang bad satlak ka pyrthei ban rakhe iaka International Women’s Day ha iing dorbar niamtre hall ka Seinraij ha Iongpiah haka sngi Balang.

Ka Kong M Lakiang, District Mission Coordinator, SSA-West Jaintia Hills kum ka kongsan haba kren iaka phang “Digital Innovation and Technology for Gender Equality” ka la pynshong nongrim ïa kane ka phang haki lai tylli ki rong kynthup ïaka rong purple (saw jngem) kaba ïeng haka nongrim jong ka hok bad kyrdan, ka rong jyrngam kaba ïeng haka nongrim jong ka jingthrang bad jingangnud bad ka rong lieh kaba ïeng haka nongrim jong ka jingkhuid jingsuba.

Ka Kong Lakiang ka la ong katkum ka jingïalam ka juk ka por jong ka jingstad saïan la ïohi shisha ba don shibun ki jingkylla kiba long ka lynti ban pynsuk bad pynkloi ïaka rukom treikam jong ki briew ha kiba bun ki liang, hynrei haba phai pat ha kawei ka liang ha kaba ïadei bad kane ka phang hap ban buh ïaka jingkylli haka jingmut jingpyrkhat namar baroh ki kynthei ki don la jong ka jingsngew, ka jinglong jingman ka rukom pyrkhat pyrdaiñ.

U GH Bareh haba kren kum u symbud kongsan ula ong haba ïanujor ïaka jinglong jingman jong ki kynthei haki jaka hapoh ka Jylla Meghalaya, kilong kiba donbok ha kiba bun ki liang bad ki ïoh ïaka kyrdan kaba kham kyrpang. Ula kyntu ruh ban long kiba tip burom ïa u Kñi-u Pa katkum ba la hikai ka niam bad nongrim jong ka dustur.

Kiwei kiwei kiba kren ki dei ka Kong G Pde, Vice-Chairperson WWO-Seiñraij, ka Kong Aloma Passah, Founder member WWO-Seinraij. Ka Kong Hima Lakiang, Chairperson WWO-Seinraij kala pyniaid iaka jingialang bad la ïoh ïaki kyntien nguhblei nguh syiem na ka Rily Suwer, Executive Member, WWO-Seinraij.