Rakhe ka VO Ratacherra iaka jingiaid lynti ba shisnem

Syllad | The Rising MeghalayaNovember 30, 2021

Ka Synroplang Village Organisation, Ratacherra kala rakhe iaka jingiaid lynti ba shisnem ka kynhun da kaba pynlong iaka jingai tika COVID-19 bad kumjuh ka jingtest iaka jingpang khiehshohrih (Malaria) haka sngi Nyngkong.

Kane ka VO kala kdup ia kiba bun ki longkmie hapoh ka kynhun naka bynta ban kyntiew iaka ioh ka kot ki longkmie ha kane ka shnong.

Haka jingrakhe ia kane ka sngi, la wan ban ai iaki longkmie hapoh kane ka kynhun da u In-charge Deputy Commissioner, East Jaintia Hills Bah SS Syiemlieh haka jingdonlang u Dolloi ka Elaka Narpuh u Ma Manbha Kyndoh, u Waheh Shnong Ratacherra u Ma Desous Pohshna, ki nongkitkam shnong bad kiwei kiwei.

U Bah SS Syiemlieh haka jingkren ula kyntu ïaki longkmie ban ym bishni iwei ia iwei hynrei ban don ka jingïatylli haka rukom treikam khnang ba kin kiew haka ïoh ka kot ïalade shimet, ka shnong ka thaw bad ka imlang sahlang. Ula ai ka jingkitbok kitrwiang ïa baroh ki nongtrei jong ka Synroplang VO ba kin nang lah ban ïai trei shitom bad ban poi sha ka thong ba ki don kum ka kynhun.

Ka Secretary Synroplang VO ka Kong Sukmon Shadong ka la ïathuh ba hapoh ka Synroplang VO la don 18 tylli ki SHG. Ïaka jingïalang la pynlong ha madan bol ka shnong Ratacherra haka jingpynïaid da ka President ka Kong Suda Pohthmi.